🔴 वरठी परिसरात रेतीचोरीवर ऐतिहासिक धाड १७ टिप्पर ट्रक जप्त; ₹6 कोटी 28 लाखांहून अधिकचा मुद्देमाल हस्तगत

वरठी | प्रतिनिधी
भंडारा जिल्ह्यात अवैध रेती उत्खनन व वाहतुकीविरोधात प्रशासनाने कडक पावले उचलत वरठी पोलीस ठाण्याच्या हद्दीत मोठी संयुक्त कारवाई केली आहे. या कारवाईत १७ टिप्पर ट्रकसह सुमारे १३७ ब्रास अवैध रेती जप्त करण्यात आली असून, जप्त मुद्देमालाची एकूण किंमत ₹6 कोटी 28 लाख 22 हजार इतकी आहे. ही कारवाई जिल्ह्यातील रेतीचोरीविरोधातील आतापर्यंतच्या सर्वात मोठ्या कारवायांपैकी एक मानली जात आहे.

🔍 कारवाईचा तपशील
दि. ७ जानेवारी २०२६ रोजी सायंकाळी ६ वाजता, जयकिसन राईस इंडस्ट्री, मोहगाव देवी परिसरात (मोहाडी तालुका) ही कारवाई करण्यात आली. वरठी मंडळ अधिकारी महादेव ज्ञानोबा इप्पर (वय ३४) यांच्या तक्रारीवरून, उपविभागीय अधिकारी भंडारा, महसूल विभाग, वरठी व मोहाडी पोलीस, तसेच उपप्रादेशिक परिवहन विभाग भंडारा यांच्या संयुक्त पथकाने ही धडक कारवाई केली.

🚛 १७ टिप्पर ट्रक अवैध वाहतुकीत पकडले
कारवाईदरम्यान विविध गावांतील १७ चालक-मालक हे परवाना नसताना अवैध रेती उत्खनन व वाहतूक करताना आढळून आले. घटनास्थळी सापडलेली रेती अंदाजे १३७ ब्रास असून, तिची किंमत सुमारे ₹8,22,000 इतकी आहे. जप्त केलेल्या १७ टिप्पर ट्रकची अंदाजे किंमत ₹6 कोटी 20 लाख आहे.

⚖️ गुन्हा दाखल
या प्रकरणी पोलीस स्टेशन वरठी येथे
अपराध क्रमांक 06/2025
कलम 303(2) भारतीय न्याय संहिता 2023
सह कलम 48(8) महाराष्ट्र जमीन महसूल अधिनियम
अन्वये गुन्हा दाखल करण्यात आला आहे.

👮 पुढील तपास सुरू
या प्रकरणाचा पुढील तपास सहाय्यक पोलीस निरीक्षक निलेश गिरी हे करीत असून, रेतीचोरीच्या मागील साखळी, मालक–ठेकेदार व संभाव्य आर्थिक नेटवर्कचा शोध घेतला जात आहे.

🚨 प्रशासनाचा स्पष्ट इशारा
ही कारवाई रेतीचोरी करणाऱ्यांसाठी थेट इशारा मानली जात असून, शासनाचा महसूल बुडवणाऱ्या व पर्यावरणाचे नुकसान करणाऱ्यांविरोधात अशीच कठोर कारवाई पुढेही सुरू राहणार असल्याचे संकेत प्रशासनाने दिले आहेत.

संकलन:- अमर वासनिक, न्यूज एडिटर, पोलिस योद्धा न्यूज नेटवर्क