📰 बाल संरक्षण क्षेत्रातील उल्लेखनीय कार्याबद्दल मुश्ताक पठाण यांचा राज्यस्तरीय गौरव

नागपूर | प्रतिनिधी
नागपूर जिल्ह्यात बाल संरक्षण क्षेत्रात उल्लेखनीय व समर्पित कार्य करणारे जिल्हा बाल संरक्षण अधिकारी मुश्ताक पठाण यांचा राज्यस्तरावर सन्मान करण्यात आला आहे. मुंबई उच्च न्यायालयाच्या माध्यमातून कार्यरत महाराष्ट्र राज्य विधी सेवा प्राधिकरण तसेच इंटरनॅशनल जस्टिस मिशन (IJM) यांच्या संयुक्त विद्यमाने छत्रपती संभाजीनगर येथे दि. ८ फेब्रुवारी २०२६ रोजी आयोजित विशेष कार्यक्रमात त्यांना प्रमाणपत्र व पुरस्कार देऊन गौरविण्यात आले.
बाल संरक्षण, बालहक्कांची प्रभावी अंमलबजावणी, बालकामगार निर्मूलन, बालशोषणाविरोधी कारवाई आणि संकटग्रस्त मुलांच्या पुनर्वसनासाठी केलेल्या उल्लेखनीय कार्याची दखल घेत हा सन्मान प्रदान करण्यात आला. कार्यक्रमास माननीय न्यायिक अधिकारी, वरिष्ठ वकील, सामाजिक संस्थांचे प्रतिनिधी आणि विविध प्रशासकीय अधिकारी उपस्थित होते.
या सन्मानामुळे नागपूर जिल्ह्यातील बाल संरक्षण विषयक कार्याला राज्यस्तरावर विशेष ओळख मिळाली असून, जिल्ह्याच्या प्रशासनासाठीही हा अभिमानाचा क्षण मानला जात आहे.
मुश्ताक पठाण यांच्या या उल्लेखनीय कार्याबद्दल न्यायाधीश तथा सचिव, जिल्हा विधी सेवा प्राधिकरण श्री. प्रवीण उन्हाळे, जिल्हा महिला व बाल विकास अधिकारी श्री. सुनील मेसरे, जिल्हा परिविक्षा अधिकारी श्री. चंद्रकांत बोंडे, संरक्षण अधिकारी साधना हटवार, विनोद शेंडे, कायदा व परिविक्षा अधिकारी सुजाता गुल्हाने तसेच महिला व बाल विकास विभागातील सर्व अधिकारी व कर्मचाऱ्यांनी त्यांचे अभिनंदन केले.
बाल संरक्षण क्षेत्रात सातत्याने काम करत असलेल्या अधिकाऱ्यांच्या प्रयत्नांमुळे समाजातील दुर्बल घटकांपर्यंत न्याय आणि संरक्षणाची सेवा पोहोचत असल्याचे यावेळी अधोरेखित करण्यात आले.