BREAKING NEWS:
नागपुर महाराष्ट्र हेडलाइन

कोंढाळी पोलीस ठाणे: ११३ वर्षांच्या जीर्ण इमारतीत सुरक्षेचा कारभार; ९७ गावांच्या रक्षणासाठी नवीन वास्तू आणि सक्षम मनुष्यबळाची प्रतीक्षा!

Summary

राष्ट्रीय महामार्गावरील वाढती गुन्हेगारी, अपघात आणि व्हीआयपी बंदोबस्ताने पोलीस यंत्रणेवर प्रचंड ताण; लोकप्रतिनिधींनी गृह विभागाकडे पाठपुरावा करण्याची मागणी! कोंढाळी (विशेष प्रतिनिधी): नागपूर-अमरावती राष्ट्रीय महामार्ग क्रमांक ५३/०६ आणि एशियन हायवे ४७ वरील अत्यंत संवेदनशील मानले जाणारे कोंढाळी पोलीस ठाणे आज स्वतःच […]

राष्ट्रीय महामार्गावरील वाढती गुन्हेगारी, अपघात आणि व्हीआयपी बंदोबस्ताने पोलीस यंत्रणेवर प्रचंड ताण; लोकप्रतिनिधींनी गृह विभागाकडे पाठपुरावा करण्याची मागणी!

कोंढाळी (विशेष प्रतिनिधी): नागपूर-अमरावती राष्ट्रीय महामार्ग क्रमांक ५३/०६ आणि एशियन हायवे ४७ वरील अत्यंत संवेदनशील मानले जाणारे कोंढाळी पोलीस ठाणे आज स्वतःच समस्यांच्या विळख्यात सापडले आहे. तब्बल ११३ वर्षांचा इतिहास असलेली या पोलीस ठाण्याची इमारत अत्यंत जीर्ण झाली असून, वाढती गुन्हेगारी आणि अपुऱ्या मनुष्यबळाच्या ओझ्याखाली पोलीस यंत्रणेवर प्रचंड ताण निर्माण झाला आहे. तत्कालीन गृहमंत्री अनिल देशमुख यांच्या कार्यकाळात नवीन इमारतीला मंजुरी मिळाल्याची चर्चा असली, तरी निधी आणि तांत्रिक प्रक्रियेअभावी ही इमारत अद्याप कागदावरच रखडल्याने नागरिकांमधून तीव्र संताप व्यक्त होत आहे.

महामार्गावरील वाढती आव्हाने

कोंढाळी पोलीस ठाण्याचे कार्यक्षेत्र पूर्व-पश्चिम ३८ किलोमीटर आणि उत्तर-दक्षिण ३४ किलोमीटरपर्यंत विस्तारलेले आहे. या विस्तीर्ण भौगोलिक क्षेत्रात येणारी ९७ गावे आणि एक लाखाहून अधिक लोकसंख्येच्या सुरक्षेची जबाबदारी तोकड्या पोलीस बळावर पार पाडावी लागत आहे.

महामार्गावरील गुन्हेगारी: राष्ट्रीय महामार्गावरील हजारो वाहनांची वर्दळ, भीषण अपघात, वाहनचोरी आणि अवैध वाहतुकीवर पोलिसांना चोवीस तास नजर ठेवावी लागते.

अवैध धंद्यांवर वॉच: परिसरातील औद्योगिक समूह, हॉटेल्स, ढाबे, रिसॉर्ट्स, लॉजिंग आणि अवैध मद्यविक्रीसह सायबर गुन्ह्यांच्या तपासाचे मोठे आव्हान पोलिसांसमोर आहे.

व्हीआयपी बंदोबस्ताचा ताण: अतिमहत्त्वाच्या व्यक्ती, न्यायाधीश आणि वरिष्ठ अधिकाऱ्यांच्या एस्कॉर्ट व न्यायालयीन बंदोबस्तात कर्मचारी गुंतल्याने नियमित गस्तीवर परिणाम होतो.

मनुष्यबळ आणि सुविधांचा अभाव

वाढत्या कामाच्या व्यापापुढे सध्याचे पोलीस संख्याबळ अत्यंत अपुरे पडत आहे. ठाण्याच्या हद्दीत कायदा व सुव्यवस्था अबाधित राखण्यासाठी तातडीने किमान २२ अतिरिक्त अधिकाऱ्यांची व कर्मचाऱ्यांची आवश्यकता असून, एकूण ५५ पोलीस अधिकारी व कर्मचाऱ्यांचे सक्षम मनुष्यबळ उपलब्ध करण्याची मागणी होत आहे. सध्या मंजूर आणि प्रत्यक्ष कार्यरत पदांची आकडेवारी जाहीर करण्याचीही गरज व्यक्त होत आहे. तसेच तक्रारदारांसाठी योग्य सुविधा, महिला व बालकांसाठी स्वतंत्र कक्ष, अभिलेख कक्ष, तपास पथकासाठी जागा आणि पुरेशा वाहनांची उपलब्धता ही काळाची गरज बनली आहे.

“११३ वर्षांच्या ऐतिहासिक कोंढाळी पोलीस ठाण्याला आता केवळ आश्वासनांची नव्हे, तर आधुनिक इमारतीची आणि सक्षम मनुष्यबळाची गरज आहे. शासनाने तातडीने निधी मंजूर करून प्रत्यक्ष बांधकामाची कालमर्यादा निश्चित करावी.”

लोकप्रतिनिधींकडून पाठपुराव्याची अपेक्षा

कोंढाळी पोलीस ठाण्याच्या या गंभीर प्रश्नाकडे काटोल-नरखेड विधानसभा क्षेत्राचे आमदार चरणसिंह ठाकूर, खासदार श्यामकुमार बर्वे आणि महसूल मंत्री तथा पालकमंत्री चंद्रशेखर बावनकुळे यांनी तातडीने लक्ष देण्याची मागणी जोर धरत आहे. लोकप्रतिनिधींनी मुख्यमंत्री तथा गृहमंत्री देवेंद्र फडणवीस यांच्याकडे पाठपुरावा करून नवीन इमारतीसाठी प्रशासकीय व आर्थिक मंजुरी आणि अतिरिक्त मनुष्यबळाचा ठोस निर्णय मार्गी लावावा, अशी अपेक्षा सर्वसामान्य नागरिकांकडून व्यक्त केली जात आहे.

ब्युरो रिपोर्ट, कोंढाळी

Leave a Reply

Your email address will not be published. Required fields are marked *