भंडारा पोलिसांचा ‘महा-स्ट्राईक’; पवनी ते लाखांदूरपर्यंत अवैध धंद्यांचे रॅकेट उध्वस्त!

सव्वा दोन लाखांचा मुद्देमाल जप्त; ८२० किलो सडवा मोहाफास अन् दारू साठ्यावर पोलिसांचा ‘बुलडोझर’!

​भंडारा (वृत्तसेवा):

जिल्ह्यात कायद्याचे राज्य अधिक मजबूत करण्यासाठी पोलीस अधीक्षक श्री. नूरुल हसन यांनी अवैध धंद्यांविरुद्ध ‘युद्ध’ पुकारले आहे. काल रात्री जिल्ह्याच्या विविध १० भागात पोलिसांनी केलेल्या कारवाईत २ लाख २० हजार २६५ रुपयांचा मुद्देमाल जप्त करण्यात आला. यात हातभट्टी दारू तयार करण्याचे साहित्य, मोहाफास आणि सट्टा साहित्याचा समावेश आहे.

​📍 कारधा अन् मोहाडीत ‘मोहाफास’चा डोंगर जप्त:

सर्वात मोठी कारवाई कारधा आणि मोहाडी हद्दीत झाली. कारधामध्ये साधना उके हिच्याकडून तब्बल ८०० किलो सडवा मोहाफास जप्त करण्यात आला, तर मोहाडीत क्रिष्णा चोपकर याच्याकडून २६० किलो साठा हस्तगत झाला. या कारवाईमुळे गावठी दारू गाळणाऱ्यांचे धाबे दणाणले आहेत.

​📍 वयोवृद्ध आरोपींचाही समावेश:

पोलिसांनी वयाचा विचार न करता कायद्याचे उल्लंघन करणाऱ्यांवर कडक हात उगारला आहे. मुंडरी येथील ८२ वर्षीय शांता किटे आणि सेंदुरवाफा येथील ७४ वर्षीय जागेश्वर मेश्राम यांच्यावरही दारूबंदी कायद्यांतर्गत गुन्हे दाखल करण्यात आले आहेत.

​📍 जुगार अन् गावठी दारूवर प्रहार:

पवनीमध्ये अफजल शेख याला वरली मटक्याच्या सट्ट्यासह पकडण्यात आले. तर करडी, गोबरवाही, साकोली आणि लाखांदूरमध्ये पोलिसांनी घरोघरी आणि अड्ड्यांवर धाडी टाकून हातभट्टीची दारू आणि देशी दारूचे पव्वे जप्त केले.

​खाकीची सज्जड तंबी!

​अप्पर पोलीस अधीक्षक श्री. निलेश मोरे यांच्या मार्गदर्शनाखाली जिल्हयातील सर्व ठाणेदारांनी ही मोहीम यशस्वी केली. “अवैध धंदा करणाऱ्यांनी आता सावध व्हावे, अन्यथा मोठी किंमत मोजावी लागेल,” असा सज्जड इशारा पोलीस प्रशासनाने दिला आहे.

​वृत्तसंकलन:

अमर वासनिक

न्यूज एडिटर,

पोलीस योद्धा न्यूज नेटवर्क