नागपूर ग्रामीण पोलिसांचा ‘मास्टरस्ट्रोक’! डीजे, लेझर अन् बीम लाईट्सवर १ नोव्हेंबरपर्यंत संपूर्ण बंदी! ​डोळ्यांचे आरोग्य अन् रस्ते सुरक्षेसाठी एसपींचे धडक आदेश; नियम मोडल्यास होणार थेट कायदेशीर कारवाई, कोंढाळी पोलीस ठाण्यात ‘शांतता समितीच्या’ बैठकीत ठाणेदार सुमित परतेकींचा कडक इशारा!

कोंढाळी: आगामी सण, उत्सव आणि विविध धार्मिक मिरवणुकांच्या पार्श्वभूमीवर नागपूर ग्रामीण पोलिसांनी कायदा-सुव्यवस्था, नागरिकांच्या डोळ्यांचे आरोग्य आणि रस्ते सुरक्षेच्या दृष्टीने एक अत्यंत मोठा आणि महत्त्वाचा प्रतिबंधात्मक निर्णय घेतला आहे! नागपूर जिल्हा ग्रामीण पोलीस क्षेत्रात तीव्र क्षमतेच्या लेझर बीम, बीम लाईट्स आणि डीजेच्या वापरावर १ नोव्हेंबर २०२६ पर्यंत पूर्णपणे बंदी घालण्यात आली आहे.

​भारतीय नागरिक सुरक्षा संहिता (BNSS), २०२३ मधील कलम १६३ अन्वये हे कठोर आदेश लागू करण्यात आले असून, नियम मोडणाऱ्यांविरोधात पोलीस प्रशासन थेट गुन्हे दाखल करणार असल्याचा थेट इशारा देण्यात आला आहे.

​🚨 ३ सप्टेंबरच्या मध्यरात्रीपासून १ नोव्हेंबरपर्यंत ‘ब्लॅकआऊट’!

​अमलबजावणीचा कालावधी: ही बंदी ३ सप्टेंबर २०२६ रोजी मध्यरात्री १२ वाजेपासून ते १ नोव्हेंबर २०२६ रोजी रात्री ११.५९ वाजेपर्यंत लागू राहील.

​हे सण येणार कक्षेत: सप्टेंबर ते नोव्हेंबर दरम्यान येणारे गोकुळाष्टमी, दहीहंडी, पोळा, तान्हा पोळा, ताजुद्दीन बाबा छब्बीसवी, गणेशोत्सवातील आगमन व विसर्जन मिरवणुका, धम्मचक्र प्रवर्तन दिन तसेच दुर्गादेवी उत्सवात या नियमांचे काटेकोर पालन करावे लागणार आहे.

​बंदीचे कारण काय?: तीव्र क्षमतेच्या लेझर व बीम लाईट्सच्या प्रकाशकिरणांमुळे नागरिकांच्या डोळ्यांना कायमची इजा होण्याचा धोका असतो. शिवाय, रस्त्यावरून जाणाऱ्या वाहनचालकांच्या डोळ्यांवर हा तीव्र प्रकाश पडल्यास वाहनावरील नियंत्रण सुटून भीषण अपघात घडण्याची शक्यता असते.

​🔒 यंत्रणा स्वतःहून ‘सील’ करा; ठाणेदार सुमित परतेकींचे आदेश!

​कोंढाळी पोलीस ठाण्यात आयोजित शांतता समिती आणि उत्सव समित्यांच्या महाबैठकीत बोलताना ठाणेदार सुमित परतेकी यांनी स्पष्ट केले की:

​”सर्व डीजे चालक, बीम लाईट मालक आणि उत्सव मंडळाच्या आयोजकांनी त्यांच्या ताब्यातील लेझर व बीम लाईट यंत्रणा स्वतःहून सीलबंद (Seal) करून ठेवाव्यात. कोणत्याही सार्वजनिक, खासगी किंवा स्थानिक कार्यक्रमात आणि मिरवणुकीत प्रतिबंधित लेझरचा वापर आढळल्यास पोलिसांकडून तत्काळ जप्ती व कायदेशीर कारवाई केली जाईल.”

​📹 जिल्हाधिकारी कुमार आशिर्वाद यांचा ‘व्हिडिओ कॉन्फरन्स’द्वारे संवाद!

​बैठकीदरम्यान नागपूरचे जिल्हाधिकारी कुमार आशिर्वाद यांनी दृकश्राव्य (Video Conferencing) माध्यमातून उपस्थितांशी थेट संवाद साधला. आगामी सण-उत्सव शांततेत, सामाजिक सलोखा राखून आणि प्रशासनाने घालून दिलेल्या नियमांच्या चौकटीत साजरे करण्याचे आवाहन त्यांनी केले.

​कृत्रिम तलावांचे आवाहन: घरगुती व लहान गणपतींच्या मूर्तींचे विसर्जन स्थानिक स्तरावर तयार केलेल्या कृत्रिम तलावांमध्येच करावे, असे आवाहन जिल्हाधिकाऱ्यांनी केले.

​🤝 स्थानिक लोकप्रतिनिधी अन् पदाधिकाऱ्यांचा ‘फुल सपोर्ट’!

​कोंढाळी पोलीस ठाण्यातील या महत्त्वपूर्ण बैठकीला कोंढाळी नगरपंचायतीचे नगराध्यक्ष योगेश चाफले, नगरसेवक स्वप्निल व्यास, ज्येष्ठ सामाजिक कार्यकर्ते बालकिसन पालीवाल, बब्लू बिसेन, नितीन ठवळे यांच्यासह परिसरातील गावोगावच्या धार्मिक, सामाजिक व सांस्कृतिक संघटनांचे पदाधिकारी मोठ्या संख्येने उपस्थित होते. सर्वांनी पोलिसांच्या या सुरक्षानिर्णयाचे स्वागत करत नियमांचे पालन करण्याची ग्वाही दिली.

​कार्यक्रमाच्या शेवटी गोपीनाथ शाखेचे प्रशांत निंभोरकर यांनी सर्व उपस्थितांचे आभार मानले.

​ब्युरो रिपोर्ट, कोंढाळी (विशेष बातमी)