मुंबई महापालिका प्रशासनाच्या चुकीचा फटका कर्मचाऱ्यांना! मार्च महिन्याचे वेतन रोखल्याने कामगारांमध्ये संताप; कामगार सेनेचा आंदोलनाचा इशारा

ANM प्रक्रियेतील गोंधळामुळे कर्मचाऱ्यांचे आर्थिक गणित कोलमडले; वेतन तात्काळ अदा करण्याची बाबा कदम यांची मागणी.
​मुंबई (ब्युरो रिपोर्ट):
बृहन्मुंबई महानगरपालिकेच्या आस्थापना विभागाच्या हलगर्जीपणामुळे हजारो पालिक कर्मचाऱ्यांचे मार्च महिन्याचे वेतन रोखले गेले असून, यामुळे कामगारांमध्ये तीव्र संतापाची लाट उसळली आहे. या गंभीर प्रश्नावर ‘म्युनिसिपल कर्मचारी कामगार सेना’ आक्रमक झाली असून, कर्मचाऱ्यांचे वेतन तात्काळ अदा करावे, या मागणीसाठी महापालिका आयुक्तांना साकडे घातले आहे.
​नेमका गोंधळ काय?
​महानगरपालिका कर्मचाऱ्यांच्या ANM (Absence Not Mentioned) चा निपटारा करण्याबाबत प्रशासनाने २ मार्च २०२६ रोजी परिपत्रक निर्गमित केले होते. मात्र, आस्थापना विभागाने याबद्दल कर्मचाऱ्यांना कोणतीही पूर्वसूचना किंवा माहिती दिली नाही. परिणामी, कर्मचाऱ्यांनी घेतलेल्या सुट्ट्यांची नोंद ‘SAP’ प्रणालीत वेळेवर होऊ शकली नाही. या तांत्रिक कारणास्तव प्रशासनाने कर्मचाऱ्यांचे पूर्ण वेतनच रोखून धरले आहे.
​ईएमआय आणि कौटुंबिक खर्चाचा प्रश्न गंभीर
​वेतन न मिळाल्यामुळे कर्मचाऱ्यांचे आर्थिक नियोजन पूर्णपणे कोलमडले आहे. अनेक कर्मचाऱ्यांचे गृहकर्ज (Housing Loan) आणि इतर बँकांचे ईएमआय (EMI) दरमहा कापले जातात. वेतन वेळेवर न मिळाल्याने हे हप्ते थकणार असून कर्मचाऱ्यांचे मोठे आर्थिक नुकसान होणार आहे. तसेच मुलांच्या शाळेची फी, ट्यूशन फी आणि दैनंदिन घरखर्च कसा चालवावा, असा संतप्त सवाल कामगार सेनेने उपस्थित केला आहे.
​प्रशासनाचा हलगर्जीपणा, सजा कर्मचाऱ्यांना का?
​”ANM प्रलंबित राहण्यास कर्मचारी जबाबदार नसून आस्थापना विभाग जबाबदार आहे. स्वतःची चूक असताना कर्मचाऱ्यांचे वेतन रोखणे हा अन्याय आहे,” अशी भूमिका म्युनिसिपल कर्मचारी कामगार सेनेचे अध्यक्ष बाबा कदम आणि उपाध्यक्ष डॉ. संजय कांबळे-बापेरकर यांनी मांडली आहे.
​रोखून धरलेले वेतन याच महिन्यात विशेष बाब म्हणून अदा करावे, अन्यथा कामगार संघटना आपल्या पद्धतीने जाब विचारेल, असा इशाराही यावेळी देण्यात आला आहे. या प्रकरणाची दखल महापालिका आयुक्त घेणार का, याकडे आता सर्व कर्मचाऱ्यांचे लक्ष लागले आहे.

​वृत्त संकलन: पोलीस योद्धा न्यूज नेटवर्क
📢 वेबमीडिया: www.policeyoddha.com
📞 बातम्या व जाहिरातीसाठी संपर्क: 090222 44767