🎬 “विठ्ठल–विठ्ठल… विठ्ठला!” — गजरात कोंढाळी झाली पंढरीमय ३१व्या अखंड नामसंकीर्तन महोत्सवानिमित्त भव्य श्री माऊली पालखी सोहळा; दहा हजारांहून अधिक भाविकांची उपस्थिती

कोंढाळी | प्रतिनिधी

“विठ्ठल माझा… माझा विठ्ठल…”
हरिनामाच्या गजरात, टाळ–मृदंगांच्या निनादात आणि पुष्पवृष्टीच्या साक्षीने कोंढाळी नगरी अक्षरशः पंढरीनगरीत परिवर्तित झाली. श्री विठ्ठल–रुक्मिणी मंदिरात आयोजित ३१व्या अखंड नामसंकीर्तन महोत्सवाअंतर्गत सोमवार, १५ डिसेंबर रोजी दुपारी बारा वाजता भव्य व दिव्य श्री माऊली पालखी सोहळा भक्तिभावात पार पडला.

सुमारे २ किलोमीटर लांबीची दिंडी नगरातील प्रमुख मार्गांवरून मार्गस्थ झाली. विदर्भासह मध्यप्रदेश व इतर प्रांतांतून आलेल्या ५०हून अधिक वारकरी दिंड्या, भजन मंडळे, झांक्या व कला पथकांनी संपूर्ण कोंढाळी भक्तिरसात न्हाऊन निघाली. या सोहळ्यात १० हजारांहून अधिक भाविकांनी सहभाग नोंदविला.

—

🎥 पालखी सोहळ्याचा भव्य क्रम — भक्ती, परंपरा आणि देखणेपणाचा संगम

पालखी मिरवणुकीत अग्रभागी झेंडा पथक (उंटासह), त्यामागे छत्रपती शिवाजी महाराजांचा घोडा, प्रसाद बँड (कोंढाळी), भगवान शंकरजींची झांकी, महाकाल पथक (लखोटिया हायस्कूलचे विद्यार्थी), मध्यप्रदेशातील ‘मोगरा’ वारकरी दिंडी, संत लटारे महाराज दिंडी (कारंजा), महिला कलश पथक, माऊली ज्ञानोबारायांचा घोडा व चोपदार, श्री विठ्ठल–रुक्मिणी मंदिर समितीची दिंडी आणि सोहळ्याचे केंद्रबिंदू असलेली मुख्य पालखी — असा देखणा क्रम भाविकांचे लक्ष वेधून घेत होता.

याशिवाय विठ्ठल–रुक्मिणी माता व महाबली हनुमानजींच्या झांक्या, परतापूर (मध्यप्रदेश) येथील दिंडी, सुमारे १० लघु दिंडी मंडळे, अकोट झांज पथक (१० ढोलांसह), ३० बालिकांचे कुमारी साक्षी खोडणकर झेंडा पथक, सजावटी घोडे–उंट आणि बालकांसह भालूचे आकर्षण या सोहळ्याला विशेष रंगत देत होते.

—

🌸 पुष्पवृष्टी, तोरणे आणि भक्तिभावाचा उत्सव

नगरातील सर्व धर्मीय नागरिक, सामाजिक–धार्मिक संस्था, व्यापारी संघटना व विविध प्रभागांकडून ठिकठिकाणी पुष्पवृष्टी करून माऊलींच्या पालखीचे स्वागत करण्यात आले. तोरणे, पताका, रांगोळ्यांनी सजलेली कोंढाळी भक्तीच्या रंगात न्हाऊन निघाली.

—

🛕 मार्ग व समारोप

ही भक्तीमय रॅली श्री विठ्ठल–रुक्मिणी मंदिर (ठवळेपूरा) येथून सुरू होऊन शनिवार पेठ, नगरपंचायत भवन, राऊतपूरा, बाजार चौक, एफ.सी. चौक, उमाठे नगर, देशमुख लेआऊट, रामनगर मार्गे श्री संत गुलाब बाबा आश्रम येथे पोहोचली.
समारोपानंतर सहभागी सर्व दिंडी व झांकी मंडळांना सन्मान (मानधन) देण्यात येणार असल्याची माहिती आयोजक समितीने दिली. त्यानंतर पालखीचे मंदिरात पुनरागमन होत भव्य दीपोत्सव साजरा करण्यात आला.

हरिनामाच्या गजरात, परंपरेच्या सन्मानात आणि एकतेच्या दर्शनात कोंढाळीचा हा पालखी सोहळा अविस्मरणीय ठरला.

संकलन:- श्री राजकुमार खोब्रागडे, मुख्य संपादक तथा डायरेक्टर