📰 भंडारा जिल्हा पोलीस वार्तापत्र : पिकाचे नुकसान, सुगंधीत तंबाखूचा मोठा साठा जप्त, रेती चोरीची ४ प्रकरणे व ५ मर्ग – जिल्ह्यात नोंदले ११ गुन्हे व अपघाती मृत्यूंची प्रकरणे

भंडारा जिल्हा पोलीसांकडून लॉकाळात विविध गुन्हे व अपघाती मृत्यूंच्या प्रकरणांची नोंद करण्यात आली आहे. नुकसानीचा गुन्हा, महाराष्ट्रात बंदी असलेला सुगंधीत तंबाखूचा अवैध साठा, रेतीची चोरटी वाहतूक तसेच वेगवेगळ्या कारणांनी झालेल्या मृत्यूंची ५ मर्ग नोंद अशा मिळून एकूण ११ प्रकरणांची नोंद जिल्ह्यातील विविध पोलीस ठाण्यांत करण्यात आली आहे.

—

१) शेतातील धानाची ‘खुबी’ उध्वस्त – कारधा येथे पिकाच्या नुकसानीचा गुन्हा

पोलीस स्टेशन कारधा हद्दीतील मौजा सिल्ली (ता. भंडारा) येथे ओमप्रकाश गोपीचंद बावणकुळे (वय ४१ वर्ष) यांच्या शेतातील धानाचा पुंजना (खुबी) जाणीवपूर्वक उध्वस्त केल्याप्रकरणी तीन संशयितांवर गुन्हा दाखल करण्यात आला आहे.

दि. १९ नोव्हेंबर २०२४ रोजी रात्री ११.४५ च्या सुमारास फिर्यादी यांच्या पाऊण एकर शेतीत सुमारे १२ क्विंटल धानाचा पुंजना होता. संशयित सौ. सुशीला राजकुमार ढुके, दिगंबर राजकुमार ढुके व सौ. गीता शामराव ढुके (तिघेही रा. सिल्ली) यांनी धानाचा पुंजना उध्वस्त करून सुमारे ४०,००० रुपये किमतीचे नुकसान केल्याची फिर्यादीची तक्रार आहे.

यावरून कारधा पोलीस ठाण्यात कलम ३२६ (थ्) भारतीय न्याय संहितेनुसार गुन्हा नोंद असून पुढील तपास पोहवा थेर हे करीत आहेत.

—

२) तुमसरमध्ये सुगंधीत तंबाखूचा साठा जप्त – ४८,५९० रुपयांचा मुद्देमाल

महाराष्ट्रात प्रतिबंधित असलेल्या विविध कंपनींच्या सुगंधीत तंबाखूच्या साठ्यावर तुमसर पोलीसांनी धाड टाकून कारवाई केली.

दि. २० नोव्हेंबर २०२५ रोजी संध्याकाळी ५.३० वाजता नेहरू नगर, तुमसर येथील घरात छापा टाकून आरोपी महेश गंगाधर पारडकर (वय ४७ वर्ष) याच्या ताब्यातून ईगल हुक्का, आर.के. हुक्का, पान बहार, राजश्री, बाबा ब्लॅक, मजा १०८, पान पराग इत्यादी ब्रँडचा सुगंधीत तंबाखू असा एकूण ४८,५९० रुपये किमतीचा अवैध मुद्देमाल जप्त करण्यात आला.

सरतर्फे पोउपनि प्रविण पाटील यांच्या फिर्यादीवरून तुमसर पोलीस ठाण्यात कलम २२३, २७५, १२३ भा.न्या.सं. अन्वये गुन्हा नोंद असून पुढील तपास पोउपनि पुरूषोत्तम राठोड करत आहेत.

—

३) आंधळगाव, सिहोरा, लाखांदुर व पवनी – रेती चोरीची सलग चार प्रकरणे

अ) आंधळगाव – ५.०६ लाखांचा ट्रॅक्टर-मुद्देमाल जप्त

आंधळगाव पोलीस स्टेशन हद्दीत पिंपळगाव शिवारात सोनालीका कंपनीचा ट्रॅक्टर (क्रमांक MH-36-9052) व विना क्रमांकाची ट्रॉली वापरून अवैध रेती वाहतूक केल्याप्रकरणी आरोपी लखपती शालीकराम चोपकर व बादल योगेश्वर चोपकर (दोघेही रा. पिंपळगाव) यांच्यावर गुन्हा नोंद करण्यात आला.

ट्रॅक्टर, ट्रॉली, एक ब्रास रेती, पावडे व प्लास्टिक घमेले असे मिळून सुमारे ५,०६,७०० रुपये किमतीचा मुद्देमाल जप्त करण्यात आला आहे. प्रकरणी कलम ३०३(२) भा.न्या.सं. तसेच महसुल व पर्यावरण संरक्षण कायद्यांचे कलम लागू करण्यात आले असून तपास पोहवा गणेश मते करत आहेत.

ब) सिहोरा – रेती भरलेला ट्रॅक्टर जप्त

कर्कापूर ते रेंगेपार रोडवर रेतीची चोरटी वाहतूक करताना स्वराज कंपनीचा ट्रॅक्टर व ट्रॉली पकडण्यात आली. ग्राम महसुल अधिकारी सिमा तुमसरे यांच्या तक्रारीवरून मालक लंकेश्वर सार्वे व सचिन भोयर यांच्यावर गुन्हा नोंद करण्यात आला.

सुमारे ५,०६,००० रुपये किमतीचा ट्रॅक्टर व एक ब्रास रेती असा मुद्देमाल जप्त करून सिहोरा पोलीसांनी पुढील तपास सुरू केला आहे.

क) लाखांदुर – न्यू हॉलंड ट्रॅक्टरसह ७.०६ लाखांचा मुद्देमाल

लाखांदुर तालुक्यातील नांदेड परिसरात नदीपात्रातून अवैध रेती वाहतूक करणाऱ्या न्यू हॉलंड कंपनीच्या ट्रॅक्टर-ट्रॉलीला महसूल व वन विभागाच्या पथकाने पकडले.

तलाठी महेंद्र बनकर यांच्या फिर्यादीवरून आरोपी रवि दोडकु भानारकर व रवि पुंडलिक नागपुरे यांच्यावर गुन्हा नोंद झाला असून सुमारे ७.०६ लाख रुपये किमतीचा ट्रॅक्टर, ट्रॉली व रेती जप्त करण्यात आली आहे.

ड) पवनी – स्वराज ट्रॅक्टरसह रेती जप्त

पवनी पोलीस स्टेशन हद्दीतील आसगाव जवळ स्वराज ८४३ एक्स.एम. ट्रॅक्टर (क्रमांक MH-36-AL-7622) व हिरव्या रंगाची ट्रॉली वापरून विनापास परवाना रेती वाहतूक केल्याचे आढळून आले.

सपोनि शिरीष भालेराव यांच्या कारवाईत एक ब्रास रेती, ट्रॅक्टर व ट्रॉली असा एकूण ७.०६ लाखांचा मुद्देमाल जप्त करण्यात आला. आरोपी चालक फरार असून त्याचा शोध सुरू आहे.

—

४) जिल्ह्यातील विविध ठिकाणी पाच मर्ग नोंद

जिल्ह्यात वेगवेगळ्या कारणांनी मृत्यू झालेल्या पाच प्रकरणांत मर्ग नोंदविण्यात आली आहे.

1. शुक्रवारी वार्ड, भंडारा – दम्याच्या आजारातून मृत्यू
सुमन हरीभाऊ धुर्वे (वय ७६) यांना दीर्घकाळ दम्याचा त्रास होता. तब्येत बिघडल्याने त्यांना एआयआयएमएस, मिहान नागपूर येथे दाखल केले असता उपचारादरम्यान ७ नोव्हेंबर रोजी त्यांचा मृत्यू झाला. भंडारा पोलीसांनी मर्ग क्र. ५१/२०२५ नोंदवून तपास सुरू केला आहे.

2. बेला परिसर – अपघातात जखमी, नंतर मृत्यू
हेमराज भाऊराव नागपुरे (वय ४०, रा. बेला) हे फर्निचरच्या कामावरून परतताना अज्ञात कार चालकाने धडक दिल्याने गंभीर जखमी झाले होते. एआयआयएमएस व नंतर मेडीकल कॉलेज नागपूर येथे उपचारादरम्यान ५ नोव्हेंबर रोजी त्यांचा मृत्यू झाला. भंडारा पोलीसांनी मर्ग क्र. ५२/२०२५ दाखल केला आहे.

3. वरठी – कर्जाच्या ताणातून आत्महत्येचा संशय
रेल्वे सेवेतून निवृत्त झाल्यानंतर घर बांधकामासाठी घेतलेल्या कर्जाच्या ताणामुळे अशोक सोमाजी तितीरमारे (वय ६१, रा. वरठी) नैराश्यात होते. १४ नोव्हेंबर रोजी रात्री ते बेशुद्ध अवस्थेत आढळून आले व पडोळे हॉस्पिटलमध्ये उपचारादरम्यान १८ नोव्हेंबरला त्यांचा मृत्यू झाला. वरठी पोलीसांनी मर्ग क्र. १९/२०२५ नोंदवून पुढील तपास सुरू केला आहे.

4. लोभी (तुमसर) – अल्पवयीन मुलीने गळफास घेतला
कु. स्वराली स्वप्निल डोंगरे (वय १३, रा. लोभी) हिने घरातील पंख्यास गळफास घेतल्याची घटना घडली. प्राथमिक उपचारानंतर तिला मेडीकल कॉलेज नागपूर येथे हलविण्यात आले, मात्र उपचारादरम्यान ९ नोव्हेंबर रोजी ती मरण पावली. अजनी पोलीसांकडून आलेल्या कागदांवरून गोबरवाही पोलीसांनी मर्ग क्र. ३६/२०२५ नोंदवून तपास सुरू केला आहे.

5. लाखांदूरचा रहिवासी, विष प्राशनाने मृत्यू – मर्ग पवनी येथे
रामचंद्र शंकर महागडे (वय ४०, रा. लाखांदूर) याने दारूच्या नशेत विषारी औषध सेवन केल्याने त्याची प्रकृती बिघडली. लाखांदूर, एआयआयएमएस नागपूर व मेडीकल कॉलेज येथे उपचारादरम्यान ७ नोव्हेंबर रोजी त्याचा मृत्यू झाला. अजनी पोलिसांकडून आलेल्या नोंदीवरून पवनी पोलीसांनी मर्ग क्र. ३९/२०२५ नोंदविला आहे.

 

—

संकलन:- अमर वासनिक, न्यूज एडिटर, पोलिस योद्धा न्यूज नेटवर्क