वनविभागाचा ‘भ्रष्ट’ कारभार अन् पवणीत बिबट्याचा ‘कहर’; एकाच रात्री २५ शेळ्यांचा बळी, जबाबदार कोण?

भंडारा/पवणी (नेरला):

भंडारा जिल्ह्यात वनविभागाची खाबुगिरी आणि प्रशासकीय उदासीनता आता निष्पाप शेतकऱ्यांच्या जीवावर आणि रोजीरोटीवर उठली आहे. पवणी तालुक्यातील नेरला येथे काल मध्यरात्री बिबट्याने धुमाकूळ घालत शामराव लोहारे या पशुपालक शेतकऱ्याच्या तब्बल २५ शेळ्या ठार केल्या. ही घटना केवळ वन्यजीव हल्ला नसून, वनविभागाच्या मागील अनेक वर्षांच्या ‘भ्रष्ट’ नियोजनाचा हा भीषण परिणाम असल्याची चर्चा आता जिल्हाभरात रंगू लागली आहे.

​२५ शेळ्यांचा बळी; पशुपालकाचे कंबरडे मोडले!

​नेरला परिसरातील शेतवस्तीवर असलेल्या लोहारे यांच्या गोट फार्मवर बिबट्याने मध्यरात्री हल्ला केला. ३० पैकी २५ शेळ्या बिबट्याने जागीच फस्त केल्या, तर एक शेळी जंगलात ओढून नेली. सकाळच्या सुमारास जेव्हा हा प्रकार उघडकीस आला, तेव्हा लोहारे कुटुंबावर दुःखाचा डोंगर कोसळला. १० वर्षांपासून मेहनतीने उभा केलेला व्यवसाय एका रात्रीत मातीत मिसळला.

​वनविभागाचा ‘हरित भ्रष्टाचार’ उघड?

​या घटनेने वनविभागाच्या कार्यक्षमतेवर गंभीर प्रश्नचिन्ह उपस्थित केले आहेत:

१. गस्तीचा दिखावा: वन्यजीव संरक्षणासाठी आणि रात्रीच्या गस्तीसाठी (Patrolling) इंधनापासून ते मनुष्यबळापर्यंत लाखो रुपयांचा निधी खर्च दाखवला जातो. मग नेरला, कलेवाडा परिसरात बिबट्याचा वावर असताना वनविभागाची टीम कुठे झोपा काढत होती?

२. कागदोपत्री उपाययोजना: जंगलात प्राण्यांना पाणी आणि अन्न उपलब्ध करून देण्यासाठी दरवर्षी मोठा निधी लाटला जातो. मात्र, प्रत्यक्षात जंगलात काहीच सोयी नसल्याने बिबट्यांनी आता मानवी वस्तीत आपला मोर्चा वळवला आहे.

३. पिंजरा लावण्यासाठी ‘वरिष्ठांची’ वाट का? परिसरात बिबट्याची दहशत असतानाही पिंजरा लावण्यासाठी वरिष्ठ अधिकाऱ्यांच्या आदेशाची वाट का पाहिली जाते? हा केवळ प्रशासकीय विलंब आहे की काही ‘अर्थपूर्ण’ तडजोडीची प्रतीक्षा?

​शेतकऱ्यांचा संताप; भ्रष्ट अधिकाऱ्यांवर कारवाईची मागणी!

​घटनेनंतर वनविभागाचे कर्मचारी पंचनाम्यासाठी पोहोचले असता, ग्रामस्थांनी आपला संताप व्यक्त केला. केवळ पंचनामे करून कागदं रंगवण्यापेक्षा, शेतकऱ्याला त्याच्या झालेल्या नुकसानीचा १००% मोबदला तातडीने मिळावा, अशी मागणी होत आहे.

​”पोलीस योद्धा न्यूज नेटवर्क”चा सवाल:

वनविभागाचा निधी अधिकारी आणि कंत्राटदारांच्या खिशात जात असल्यामुळेच आज शेतकरी नागवला जात आहे का? जर वेळेवर गस्त आणि योग्य उपाययोजना केल्या असत्या, तर आज २५ मुक्या प्राण्यांचा बळी गेला असता का?

​शेतकऱ्यांनो आणि नागरिकांनो सावधान!

वनविभागाच्या भरवशावर न राहता सतर्क राहा. तुमच्या भागातील भ्रष्टाचाराची आणि हलगर्जीपणाची माहिती आम्हाला कळवा, आम्ही तुमचा आवाज प्रशासनापर्यंत पोहोचवू!

​वृत्त संकलन:

अमर वासनिक

न्यूज एडिटर, पोलीस योद्धा न्यूज नेटवर्क

मो. ७७७४९८०४९१

🌐 www.policeyoddha.com