आ. सुधीर मुनगंटीवार यांच्या पाठपुराव्याला यश; चंद्रपूरमध्ये २३० कोटींच्या २००४ घरांना केंद्राची मंजुरी

चंद्रपूर : पंतप्रधान आवास योजनेअंतर्गत नवीन चंद्रपूर (म्हाडा कॉलनी) परिसरात उभारण्यात येणाऱ्या २००४ घरांच्या सुमारे २३० कोटी रुपयांच्या प्रस्तावाला केंद्र सरकारची मंजुरी मिळाली आहे. या प्रकल्पासाठी आमदार सुधीर मुनगंटीवार यांनी सातत्याने पाठपुरावा केल्याचा दावा करण्यात येत असून, पहिल्या टप्प्यातील मंजुरीमुळे शहरातील हजारो गरजू कुटुंबांचे “स्वतःच्या घराचे” स्वप्न साकार होण्याच्या दिशेने पाऊल पडल्याचे मानले जात आहे.
मुनगंटीवार यांनी यापूर्वी १० हजार घरकुल प्रकल्पाची व्यापक संकल्पना मांडत संबंधित प्रस्ताव केंद्र सरकारकडे पाठविण्यासाठी पुढाकार घेतला होता. या संदर्भात त्यांनी राज्यमंत्री पंकज भोयर तसेच महाराष्ट्र गृहनिर्माण व क्षेत्र विकास प्राधिकरण (म्हाडा) यांच्या वरिष्ठ अधिकाऱ्यांसोबत मंत्रालयात बैठक घेऊन प्रकल्पाला गती देण्याचे प्रयत्न केले होते. त्याच प्रयत्नांचा परिपाक म्हणून पहिल्या टप्प्यातील २००४ घरांना मंजुरी मिळाल्याचे सांगितले जाते.
या निर्णयामुळे शहरातील आर्थिकदृष्ट्या दुर्बल व मध्यमवर्गीय नागरिकांना मोठा दिलासा मिळणार असल्याचे मत व्यक्त होत आहे. उर्वरित घरकुल प्रकल्पालाही पुढील काळात मंजुरी मिळावी, यासाठी प्रयत्न सुरू असल्याची माहिती देण्यात आली आहे.
दरम्यान, “नवीन चंद्रपूर” संकल्पनेअंतर्गत शहरातील पायाभूत सुविधांवरही भर देण्यात येत आहे. गायत्री शक्तिपीठ परिसरातील विकासकामे, रस्त्यांचे चौपदरीकरण, पार्किंग व सौंदर्यीकरण, म्हाडाच्या जागेत ऑक्सिजन पार्क व गार्डन उभारणी, तसेच पोलिस गृहनिर्माण व प्रशिक्षण केंद्रासाठी निधी मिळविण्यासाठी पाठपुरावा सुरू असल्याचे सांगितले जाते. नागपूर रोड ते देवाडा शिव ३० मीटर रस्त्याच्या प्रस्तावालाही गती देण्याचे प्रयत्न सुरू आहेत.
या घडामोडींमुळे चंद्रपूरच्या शहरी विकासाला नवे वळण मिळण्याची अपेक्षा व्यक्त होत असून, मंजुरीनंतर स्थानिक नागरिकांनी समाधान व्यक्त केले आहे. आगामी काळात या प्रकल्पाची अंमलबजावणी कितपत गतीने होते, याकडे सर्वांचे लक्ष लागले आहे.