🔴 भंडारा जिल्ह्यात अवैध जुगार व दारू अड्ड्यांवर पोलिसांची धडक कारवाई ₹1 लाख 10 हजार 870 रुपयांचा मुद्देमाल जप्त; आठ ठिकाणी स्वतंत्र गुन्हे दाखल

भंडारा | प्रतिनिधी
जिल्ह्यातील अवैध धंदे समूळ नष्ट करण्याच्या उद्देशाने जिल्हा पोलीस अधीक्षक श्री. नूरुल हसन यांच्या स्पष्ट आदेशानुसार भंडारा जिल्ह्यातील विविध पोलीस स्टेशन हद्दीत जुगार व हातभट्टी दारू अड्ड्यांवर एकाचवेळी कडक कारवाई करण्यात आली. या संयुक्त कारवाईत एकूण ₹1,10,870 रुपयांचा अवैध मुद्देमाल जप्त करण्यात आला असून संबंधित आरोपींविरोधात महाराष्ट्र जुगार प्रतिबंधक कायदा व महाराष्ट्र दारूबंदी अधिनियमान्वये गुन्हे दाखल करण्यात आले आहेत.
साकोलीत जुगार अड्ड्यावर धाड
पोलीस स्टेशन साकोली हद्दीत (अप.क्र. 18/2025) अशोक कारु मंडलवार (वय 53, रा. आमगाव बुज.) याच्याविरोधात वरली मटका जुगार प्रकरणात कारवाई करण्यात आली. यावेळी सट्टापट्टी कागद, डॉट पेन व ₹610 रोख रक्कम असा एकूण ₹615 चा मुद्देमाल जप्त करण्यात आला.
अडयाळमध्ये वरली मटका प्रकरण
पोलीस स्टेशन अडयाळ (अप.क्र. 08/2026) येथे शामराव जयदेव वैद्य (वय 54) याच्याकडून ₹770 रोख रक्कम, सट्टापट्टी कागद व साहित्य असा ₹775 चा माल जप्त करण्यात आला.
मोहाडी, कारधा, सिहोरा येथे हातभट्टी दारूवर कारवाई
मोहाडी पोलीस स्टेशन अंतर्गत श्रीमती गीताबाई नंदनवार (वय 65) हिच्याकडून 12 लिटर हातभट्टी दारू (₹2,400) जप्त करण्यात आली.
कारधा पोलीस स्टेशन हद्दीत शिवकुमार शामकुवर (वय 40) याच्याकडून 8 लिटर मोहफुल दारू व 28 देशी दारू निप असा ₹2,720 चा मुद्देमाल हस्तगत करण्यात आला.
सिहोरा पोलीस स्टेशन हद्दीत देवानंद नागपुरे (वय 33) याच्याविरोधात ऊसाच्या वाडीत धाड टाकून 500 किलो सडवा मोहापास (₹1,00,000) जप्त करण्यात आला.
तुमसर, गोबरवाही व लाखनीतही कारवाई
तुमसर पोलीस स्टेशन (अप.क्र. 19/2026) येथे श्रीमती मंदा उपारकर (वय 50) हिच्याकडून 10 लिटर हातभट्टी दारू (₹2,000) जप्त करण्यात आली.
गोबरवाही पोलीस स्टेशन (अप.क्र. 13/2026) अंतर्गत सौ. अंजनी मरस्कोल्हे (वय 42) हिच्याकडून 10 लिटर हातभट्टी दारू (₹2,000) जप्त झाली.
लाखनी पोलीस स्टेशन (अप.क्र. 09/2026) येथे भाऊराव कोल्हे (वय 50) याच्याकडून देशी दारूचे 9 पव्वे (₹360) हस्तगत करण्यात आले.
अवैध धंद्यांविरोधात कठोर भूमिका
या सर्व कारवाया संबंधित पोलीस स्टेशनचे ठाणेदार व पोलीस अंमलदार यांनी जिल्हा पोलीस अधीक्षक श्री. नूरुल हसन यांच्या मार्गदर्शनाखाली केल्या आहेत.
जिल्ह्यातील अवैध जुगार व दारू व्यवसायावर यापुढेही कठोर कारवाई सुरूच राहील, असा इशारा पोलीस प्रशासनाने दिला आहे.

संकलन:- अमर वासनिक, न्यूज एडिटर पोलिस योद्धा न्यूज नेटवर्क