🔴 पालांदूर पोलिसांची रेतीचोरीवर कारवाई; ट्रॅक्टरसह अवैध रेती जप्त, एकावर गुन्हा दाखल

पालांदूर | प्रतिनिधी
पालांदूर पोलीस स्टेशन हद्दीत अवैध रेती वाहतुकीविरोधात पोलिसांनी धडक कारवाई करत रेतीचोरीचा प्रकार उघडकीस आणला आहे. शासनाच्या मालकीची रेती विनापरवाना वाहतूक करताना एका आरोपीला ताब्यात घेण्यात आले असून त्याच्याविरोधात गुन्हा नोंद करण्यात आला आहे.
याप्रकरणी उमेश अशोक गभणे (वय ३२, रा. गुरढा, ता. लाखनी, जि. भंडारा) हा आरोपी दि. ८ जानेवारी २०२६ रोजी सकाळी ६.४५ ते ७.४५ वाजेदरम्यान मौजा डोंगरगाव (साक्षर) शिवारात, सुमारे १० किलोमीटर उत्तरेस, आपल्या ताब्यातील ट्रॅक्टरमधून शासनाच्या मालकीची रेती (गौण खनिज) विनापरवाना व बेकायदेशीररीत्या वाहतूक करताना आढळून आला.
या कारवाईदरम्यान आरोपीकडून संबंधित ट्रॅक्टर व अवैध रेतीचा मुद्देमाल जप्त करण्यात आला. या प्रकरणी फिर्यादी पोलीस हवालदार विजय विठ्ठलराव राऊत (वय ४८, नेमणूक – स्थानिक गुन्हे शाखा, भंडारा) यांच्या लेखी तक्रारीवरून पालांदूर पोलीस स्टेशन येथे अपराध क्रमांक ०५/२०२६ अन्वये कलम ३०३(२) भारतीय न्याय संहिता अंतर्गत गुन्हा दाखल करण्यात आला आहे.
या प्रकरणाचा पुढील तपास पोलीस हवालदार झलके करीत असून, अवैध रेती उत्खनन व वाहतुकीविरोधात पुढेही कठोर कारवाई करण्यात येणार असल्याचे पोलीस प्रशासनाकडून सांगण्यात आले आहे.