🔴 साकोलीत रेतीचोरीवर पोलिसांची कारवाई; ट्रॅक्टर-ट्रॉलीसह आरोपी ताब्यात

साकोली | प्रतिनिधी
साकोली तालुक्यात अवैध रेती उत्खनन व वाहतुकीविरोधात पोलिसांनी धडक कारवाई करत रेतीचोरी प्रकरणातील आरोपीस रंगेहात पकडले आहे. साकोली पोलीस स्टेशन हद्दीत ही कारवाई करण्यात आली असून, एक ब्रास अवैध रेतीसह ट्रॅक्टर-ट्रॉली जप्त करण्यात आली आहे.
पोलिसांनी दिलेल्या माहितीनुसार, आरोपी नरेश महादेव हटवाद (वय ४८), रा. बरडकिन्ही, ता. साकोली, जि. भंडारा हा दिनांक ८ जानेवारी २०२६ रोजी सकाळी ८ वाजताच्या सुमारास मौजा सासरा ते मिरेगाव रोडवर, सुमारे २० कि.मी. अंतरावर, स्वराज कंपनीच्या निळ्या रंगाच्या ट्रॅक्टरद्वारे अवैधरीत्या रेती वाहतूक करत असल्याचे निदर्शनास आले.
सदर ट्रॅक्टर (क्र. MH-36-T-3357) ला विनाक्रमांक लाल रंगाची ट्रॉली जोडलेली असून, त्यामध्ये अंदाजे ०१ ब्रास अवैध रेती भरलेली होती. या रेतीची अंदाजे किंमत ₹६,००० इतकी असल्याचे पोलिसांनी सांगितले.
या प्रकरणी फिर्यादीच्या लेखी तक्रारीवरून पोलीस स्टेशन साकोली येथे अपराध क्रमांक १६/२०२६ अन्वये कलम ३०५ (ई) भा.न्या.सं. २०२३ अंतर्गत गुन्हा नोंदविण्यात आला आहे. आरोपीविरुद्ध पुढील तपास पोलीस हवालदार अनिफ राऊत हे करीत आहेत.
अवैध रेती उत्खननामुळे पर्यावरणाचा होत असलेला ऱ्हास व शासनाचा महसूल बुडत असल्याच्या पार्श्वभूमीवर, पोलिसांकडून अशा कारवाया अधिक तीव्र करण्यात येणार असल्याचा इशारा प्रशासनाने दिला आहे.