🎬 वरठीत रेती माफियांवर महाकाय कारवाई! सिरसी परिसरात एकाचवेळी चार बारा चक्का ट्रक जप्त; १ कोटी ६२ लाखांचा मुद्देमाल ताब्यात महसूल व पोलिसांचा संयुक्त धडक कारवाईत रेती तस्करांचे धाबे दणाणले

वरठी | प्रतिनिधी
वरठी पोलीस स्टेशन हद्दीत अवैध रेती तस्करीविरोधात प्रशासनाने मोठी आणि धडाकेबाज कारवाई करत एकाच ठिकाणी चार बारा चक्का ट्रक जप्त केले आहेत. या कारवाईत तब्बल १ कोटी ६२ लाख ४० हजार रुपयांचा मुद्देमाल ताब्यात घेण्यात आला असून, रेती माफियांमध्ये खळबळ उडाली आहे.
दि. १९ डिसेंबर २०२५ रोजी दुपारी २.४५ वाजताच्या सुमारास, मौजा सिरसी (मानिक शहारे यांचे गोडावून परिसरापासून सुमारे २ किमी दक्षिण) येथे महसूल व पोलिसांच्या संयुक्त पथकाने ही कारवाई केली. शासनाच्या मालकीची रेती विनापरवाना व बेकायदेशीररीत्या वाहतूक केली जात असल्याची माहिती मिळताच प्रशासनाने सापळा रचला.
🚛 चार ट्रक, चार गुन्हे, एकाच वेळी कारवाई
या कारवाईत खालील बारा चक्का वाहने व रेती जप्त करण्यात आली –
1️⃣ AP-39-UK-4180 – चालक व मालक फरार
2️⃣ MH-40-BB-7484 – चालक व मालक फरार
3️⃣ MH-36-AB-2907 – चालक/मालक दिलीप गायधने (रा. कोथुर्णा)
4️⃣ MH-36-AA-7484 – चालक/मालक शुक्राचार्य गुलाब ईश्वरकर (रा. कोथुर्णा)
प्रत्येक वाहनामध्ये १० ब्रास रेती आढळून आली. प्रत्येकी ट्रकची किंमत अंदाजे ४० लाख रुपये, तर रेतीची किंमत ६० हजार रुपये असून, एका ट्रकसह एकूण किंमत ४०.६० लाख रुपये इतकी आहे.
⚖️ कठोर कायद्यांतर्गत गुन्हे दाखल
या प्रकरणी महसूल अधिकारी (तलाठी) अल्का नानाजी माटे यांनी दिलेल्या लेखी तक्रारीवरून वरठी पोलीस स्टेशनमध्ये अप.क्र. 396 ते 399/2025 अंतर्गत गुन्हे नोंदविण्यात आले आहेत.
आरोपींविरुद्ध –
भा.न्या.सं. कलम 303(2)
महाराष्ट्र जमीन महसूल अधिनियम कलम 48(8)
पर्यावरण संरक्षण अधिनियम कलम 7 व 9
अन्वये कारवाई करण्यात आली आहे.
🔍 पुढील तपास सुरू
या सर्व प्रकरणांचा पुढील तपास सहायक फौजदार सोनवणे (ब.नं. 384) हे करीत असून, फरार चालक व मालकांचा शोध घेण्यासाठी विशेष पथके कार्यरत करण्यात आली आहेत.
🚨 रेती माफियांना स्पष्ट इशारा
वरठी परिसरात अवैध रेती वाहतुकीविरोधात अशी मोठी कारवाई झाल्याने रेती माफियांमध्ये भीतीचे वातावरण निर्माण झाले आहे. प्रशासनाने स्पष्ट इशारा दिला असून, शासनाची मालमत्ता लुटणाऱ्यांवर कठोर कारवाई सुरूच राहणार असल्याचे संकेत दिले आहेत.

संकलन:- अमर वासनिक, न्यूज एडिटर, पोलिस योद्धा न्यूज नेटवर्क