सत्ता येणार – सत्ता जाणार; पण संविधान वाचले पाहिजे! “वोट चोर – गद्दी छोड संघर्ष यात्रा” नागपूर जिल्ह्यातून प्रारंभ – काँग्रेसच्या कार्यकर्त्यांचा मोठा प्रतिसाद

काटोल –
देशाच्या राजकारणात गेल्या काही दिवसांपासून मतदान चोरी हा मुद्दा केंद्रबिंदू ठरत असून, लोकसभेचे विरोधी पक्षनेते राहूल गांधी यांनी २३ ऑगस्ट रोजी नवी दिल्ली येथे पत्रकार परिषदेत याबाबत मोठा आरोप करताच देशभरात नवा राजकीय वादंग पेटला आहे.
राहूल गांधी यांनी आपल्या पत्रकार परिषदेत स्पष्ट शब्दांत सांगितले की, “देशातील निवडणुकीची प्रक्रिया ही लोकशाहीचा पाया आहे; पण मतदारांच्या विश्वासाला तडा जाईल असे प्रकार मोठ्या प्रमाणावर घडत आहेत. निवडणूक आयोगाला या गंभीर मुद्द्यावर उत्तर देण्याऐवजी ते मगरूरी दाखवत आहेत.”
त्यांच्या या वक्तव्यानंतर बिहारपासून महाराष्ट्रापर्यंत लाखोंच्या संख्येने नागरिक रस्त्यावर उतरले असून, “वोट चोर – गद्दी छोड” हे घोषवाक्य काँग्रेसच्या आंदोलनाचे नवे रणशिंग ठरत आहे.
कामठीतून संघर्ष यात्रेचा एल्गार
महाराष्ट्रात या संघर्ष आंदोलनाचे नेतृत्व माजी मंत्री सुनील केदार करत आहेत. येत्या ३ सप्टेंबर रोजी नागपूर जिल्ह्यातील कामठी शहरातून या “संविधान बचाव – वोट चोर गद्दी छोड संघर्ष यात्रेचा” प्रारंभ होणार आहे.

या रॅलीची सुरुवात भारतरत्न डॉ. बाबासाहेब आंबेडकर चौकातून होऊन कृषी उत्पन्न बाजार समितीच्या प्रांगणात भव्य जाहीरसभेने केली जाणार आहे.
कार्यक्रमाच्या पूर्वतयारीसाठी झालेल्या बैठकीत याज्ञवल्क्य जिचकार, प्रकाश वसू, अभिजित सपकाळ यांनी मार्गदर्शन केले. त्यांनी सांगितले की, “लोकशाही वाचवायची असेल, संविधानाचे रक्षण करायचे असेल, तर नागरिकांनी मोठ्या संख्येने संघर्ष यात्रेत सहभागी व्हावे.”
काँग्रेस कार्यकर्त्यांचा उत्साह
कामठीतील या कार्यक्रमासाठी काटोल-नरखेड तालुक्यातील काँग्रेसचे शेकडो कार्यकर्ते तयारीला लागले आहेत.
या नियोजन बैठकीत भास्कर पराड, निशिकांत नागमोते, अरूण उइके, सतिश चव्हाण, मोहन ठवळे, प्रशांत पवार, पदम डेहनकर, विनोद माकोडे, अंकित चव्हाण, शेख सुभान, कुणाल भांगे, अन्नू पठाण, गफ्फार शाह, लखन तेलंगे, राहूल राठोड यांच्यासह मोठ्या संख्येने स्थानिक पदाधिकारी व कार्यकर्ते उपस्थित होते.
ते सर्व “वोट चोर गद्दी छोड” या घोषणांनी सभागृह दणाणून सोडत होते.
नेत्यांचे रोखठोक उद्गार
या संघर्ष यात्रेला आकार देताना काँग्रेसच्या नेत्यांनी भाजप सरकारवर जोरदार टीका केली.

सुनील केदार म्हणाले, “सत्ता येते-जाते; पण देशाची आत्मा असलेले संविधान वाचले पाहिजे. आराजकतेचे वातावरण रोखले नाही तर देश कोलमडून पडेल.”
खासदार शाम कुमार बर्वे यांनी भाष्य करताना केंद्र सरकारवर आरोप केला की, “भाजप सरकार शेतकरी व बेरोजगार विरोधी आहे. एस. आय. आर. सारख्या महत्त्वाच्या विषयावर चर्चा करण्यास ते तयार नाहीत. हे सरकार फक्त जनतेचा आवाज दाबण्यात गुंतलेले आहे.”
माजी मंत्री राजेंद्र मुळक यांनी इशारा दिला की, “देशातील लोकशाही मोडून टाकण्याचा प्रयत्न होत आहे. देशाला हुकूमशाहीकडे नेले जात आहे. या विरोधात काँग्रेस रस्त्यावर उतरणार आहे.”
तर युवा नेत्री अश्विनी बैस यांनी थेट पंतप्रधानांवर प्रश्नचिन्ह उपस्थित केले –
“देशातील युवकांना नोकरीसाठी शैक्षणिक पात्रता तपासली जाते. मग देशाचे पंतप्रधान स्वतःची पदवी का दाखवत नाहीत? पारदर्शकता कुठे गेली?”
अंजनगाव ग्रामपंचायतीचा भव्य सत्कार
या निमित्ताने काँग्रेसचे खासदार शाम कुमार बर्वे, माजी मंत्री सुनील केदार व राजेंद्र मुळक यांचा अंजनगाव ग्रामपंचायतीतर्फे भव्य सत्कार करण्यात आला. सरपंच, उपसरपंच व सर्व ग्रामपंचायत सदस्यांनी त्यांचे स्वागत केले.

या वेळी गावाच्या विकासासाठी आवश्यक त्या सुविधा पुरविण्याचे आश्वासन खासदार बर्वे व माजी मंत्री केदार यांनी दिले.
“गावागावातून या संघर्ष यात्रेला पाठिंबा मिळत असल्याने आंदोलन जनतेच्या मनातील आकांक्षा व्यक्त करणारे ठरणार आहे,” असे त्यांनी नमूद केले.
*आंदोलनाची राष्ट्रीय पातळीवर चर्चा*
राहूल गांधी यांनी देशातील मतदान प्रक्रियेतील संशयास्पद बाबींवर केलेले आरोप हे फक्त महाराष्ट्रापुरते मर्यादित नसून, बिहार, हरियाणा, मध्यप्रदेश अशा अनेक राज्यांतील निवडणुकांमध्ये मतदान चोरी झाल्याचे पुरावे जनतेसमोर येत असल्याचे काँग्रेसचे म्हणणे आहे.
बिहारमध्ये आधीच लाखोंच्या संख्येने नागरिक “वोट चोर – गद्दी छोड” या आंदोलनात सहभागी होत आहेत. महाराष्ट्रातही काँग्रेसने हे रणशिंग फुंकल्याने आगामी विधानसभा निवडणुकांचा राजकीय रंगत वाढणार यात शंका नाही.
संविधान बचावाचे रणशिंग
देशातील प्रत्येक नागरिकाच्या मनात लोकशाहीची भावना जिवंत ठेवण्यासाठी काँग्रेसने संविधान बचावाचा मुद्दा अग्रभागी आणला आहे.
काँग्रेस नेत्यांच्या मते, “सत्ताधाऱ्यांनी निवडणुकीच्या प्रक्रियेला गालबोट लावले तर लोकशाहीवर घाला घालणारे ठरेल. म्हणूनच जनतेच्या मतदानाचा सन्मान राखण्यासाठी, संविधानाचे रक्षण करण्यासाठी हा संघर्ष आवश्यक आहे.”

कामठीतून सुरू होणारी काँग्रेसची ही संघर्ष यात्रा केवळ महाराष्ट्रापुरती मर्यादित नसून देशातील लोकशाही व संविधान वाचविण्यासाठी उभारलेले एक मोठे आंदोलन मानले जात आहे.
राहूल गांधी यांच्या नेतृत्वाखाली काँग्रेसने पुकारलेले हे रणशिंग जनतेत नवा उत्साह निर्माण करत असून,
“वोट चोर – गद्दी छोड” हे घोषवाक्य पुढील काळातील राजकारणात निर्णायक ठरेल, अशी चर्चा राजकीय वर्तुळात सुरू आहे.

–