लाखांदूर तालुक्यात ‘महाराजस्व समाधान’चा धडाका! प्रशासन थेट जनतेच्या दारी; १४ मार्चला बारव्हा येथे रंगणार लोकदरबार!

​उपजिल्हाधिकारी लोंढे व तहसीलदार वैभव पवार यांचे ‘मिशन समाधान’; वर्षातून ६ वेळा होणार आयोजन!
​लाखांदूर (भंडारा):
सामान्य नागरिकांना शासकीय कार्यालयांचे उंबरठे झिजवण्यापासून मुक्ती देण्यासाठी आणि शासनाच्या लोककल्याणकारी योजना थेट घरापर्यंत पोहोचवण्यासाठी लाखांदूर तहसील प्रशासनाने कंबर कसली आहे. ‘छत्रपती शिवाजी महाराज महाराजस्व समाधान शिबिर’ (टप्पा १) अंतर्गत आता प्रशासकीय यंत्रणा स्वतः जनतेच्या दारी जाणार असून, तालुक्यातील प्रत्येक महसूल मंडळ स्तरावर वर्षातून तब्बल ६ वेळा या शिबिरांचे आयोजन करण्यात येणार आहे.
​१४ मार्चला बारव्हा येथे ‘महा-शिबिर’!
​या विशेष अभियानांतर्गत दिनांक १४ मार्च २०२६ रोजी बारव्हा येथील जिल्हा परिषद प्राथमिक शाळेत सकाळी १० ते ५ या वेळेत भव्य शिबिराचे आयोजन करण्यात आले आहे. या शिबिरात नागरिकांच्या तक्रारींचे आणि प्रलंबित कामांचे जागेवरच निराकरण करण्यात येणार आहे.
​तहसीलदारांचा ‘ॲक्शन प्लॅन’
​नुकत्याच पार पडलेल्या आढावा सभेत उपजिल्हाधिकारी लोंढे आणि लाखांदूरचे तहसीलदार वैभव पवार यांनी प्रशासकीय यंत्रणेला कडक सूचना दिल्या आहेत. नागरिकांना छोट्या कामांसाठी शहरात येण्याची गरज भासू नये, यासाठी तलाठी, मंडळ अधिकारी आणि संबंधित सर्व विभागांचे अधिकारी एकाच छताखाली उपलब्ध राहून जनतेचे प्रश्न सोडवतील.
​शिबिराची प्रमुख वैशिष्ट्ये आणि लाभ:
​जागेवरच निकाल: फेरफार नोंदी, जातीचे दाखले, उत्पन्न प्रमाणपत्र आणि रेशन कार्डशी संबंधित अडचणींचे तात्काळ निवारण केले जाईल.
​शासकीय योजनांची गंगा: संजय गांधी निराधार योजना, श्रावणबाळ योजना यांसह इतर कल्याणकारी योजनांचे अर्ज स्वीकारले जातील.
​नियमितता: प्रत्येक महसूल मंडळ स्तरावर वर्षातून सहा वेळा अशा शिबिरांचे आयोजन करून सातत्य राखले जाईल.
​पारदर्शकता: महसूल प्रशासनाचा हा ‘लोकदरबार’ पूर्णपणे पारदर्शक पद्धतीने चालणार असून सामान्य माणसाला न्याय मिळवून देणे हेच प्रथम प्राधान्य असेल.
​”सामान्य माणसाला न्याय मिळवून देणे हेच आमचे प्राधान्य आहे. महाराजस्व समाधान शिबिराच्या माध्यमातून लाखांदूर तालुक्यातील एकही नागरिक शासकीय लाभापासून वंचित राहणार नाही, याची आम्ही पूर्ण दक्षता घेत आहोत.”
— वैभव पवार, तहसीलदार, लाखांदूर.
​वृत्त संकलन: पोलीस योद्धा न्यूज नेटवर्क
📢 वेबमीडिया: www.policeyoddha.com