नववर्षाच्या पहिल्याच दिवशी ‘बाबा महाकाल’च्या जयघोषात गोंदिया न्हालं भक्तिरसात १०८ वैवाहिक जोडप्यांच्या हस्ते भव्य महाआरती

गोंदिया | प्रतिनिधी — नववर्ष २०२६च्या मंगल प्रभाती गोंदिया शहरातील अंडरग्राऊंड भागात असलेल्या घाटवाले हनुमानजी मंदिराच्या प्रांगणात भक्ती, तेज आणि श्रद्धेचा अनुपम संगम अनुभवायला मिळाला. वर्षाच्या पहिल्याच दिवशी बाबा महाकालजींच्या भव्य महाआरतीचे दिमाखदार आयोजन करण्यात आले होते. जय श्री महाकाल सेवा समिती व जय श्री महाकाल महिला सेवा समिती यांच्या संयुक्त विद्यमाने पार पडलेल्या या महाआरतीत १०८ वैवाहिक जोडप्यांनी एकत्र येत बाबा महाकालजींच्या चरणी दीप अर्पण केले.
ढोल-ताशांचा निनाद, मंत्रोच्चारांचा गजर आणि “हर हर महादेव”च्या जयघोषात संपूर्ण परिसर भक्तिरसात न्हाऊन निघाला. नववर्षाच्या पहिल्या क्षणापासूनच बाबा महाकालजींच्या आशीर्वादाने जीवनात आरोग्य, सुख-समृद्धी आणि विकास नांदो, अशी प्रार्थना भाविकांच्या ओठांवर होती.
या पावन सोहळ्याला उपस्थित राहून राजेंद्र जैन (माजी आमदार) यांनी बाबा महाकालजींची महाआरती करून आशीर्वाद घेतला. जनतेसाठी आरोग्य, शांती, समृद्धी व प्रगती लाभो, अशी मनोभावे प्रार्थना त्यांनी केली. त्यांच्या उपस्थितीमुळे कार्यक्रमाची शोभा अधिकच वाढली.
महाआरतीच्या आयोजनात लोकेश (कल्लू) यादव, देवेंद्रनाथ चौबे, राजू एन. जैन, अखिलेश सेठ, केतन तुरकर, निर्मला मिश्रा, बंटी मिश्रा, कल्पना ओंकार बनसोड, नीती विनोद राय, श्रेयस खोब्रागडे यांच्यासह असंख्य भाविक मोठ्या संख्येने उपस्थित होते. स्त्री-पुरुष, युवक-युवती, वृद्ध—सर्वांनी एकत्र येत बाबा महाकालजींच्या चरणी दीप उजळले आणि नववर्षाची सुरुवात भक्तीभावाने केली.
ही भव्य महाआरती केवळ धार्मिक विधी न राहता सामूहिक श्रद्धा, एकात्मता आणि सकारात्मक ऊर्जेचा उत्सव ठरली. नववर्षाच्या पहिल्याच दिवशी गोंदिया शहरात उमटलेला हा भक्तिरसाचा सागर भाविकांच्या मनात दीर्घकाळ स्मरणात राहील, अशी भावना उपस्थितांनी व्यक्त केली.

संकलन:- अमर वासनिक, न्यूज एडिटर, पोलिस योद्धा न्यूज नेटवर्क