🔴 सरस्वती विद्यालय व कनिष्ठ महाविद्यालयाचा राष्ट्रीय स्तरावर गौरव; रोवर–रेंजर नॅशनल कॅम्पमध्ये विद्यार्थ्यांचा दमदार सहभाग

अर्जुनी मोर | प्रतिनिधी
भारत स्काऊट गाईड संघटनेच्या वतीने जांभोरी (छत्तीसगड) येथे आयोजित करण्यात आलेल्या पहिल्या राष्ट्रीय रोवर–रेंजर कॅम्पमध्ये सरस्वती विद्यालय व कनिष्ठ महाविद्यालयाच्या विद्यार्थ्यांनी उत्स्फूर्त सहभाग नोंदवत महाराष्ट्राचे प्रभावी प्रतिनिधित्व केले.
या राष्ट्रीय कॅम्पमध्ये देशभरातील रोवर–रेंजर सहभागी झाले होते. कॅम्पदरम्यान विविध सांस्कृतिक, बौद्धिक व कौशल्याधारित स्पर्धांचे आयोजन करण्यात आले होते. यामध्ये फॅशन शोमध्ये संमेक वैद्य, युथ पार्लमेंटमध्ये वैष्णवी डोंगरवार, पोवाडा स्पर्धेत हिमांशू बोरकर, तसेच लोकनृत्य व इतर सांस्कृतिक स्पर्धांमध्ये महाविद्यालयाच्या विद्यार्थ्यांनी उल्लेखनीय सहभाग घेतला.
तसेच राज्य प्रदर्शनी अंतर्गत बिनभांड्याचे जेवण, तंबू सजावट आदी स्पर्धांमध्ये विद्यार्थ्यांनी महाराष्ट्र राज्याचे प्रतिनिधित्व केले. या कॅम्पमधील विशेष आकर्षण ठरलेल्या परेड कार्यक्रमात, महाराष्ट्र राज्याचे माननीय राज्यपाल यांच्या उपस्थितीत हिमांशू बोरकर, आनंद शिंदे, लक्षिका आकरे व वैष्णवी डोंगरवार यांनी परेडमध्ये सहभागी होत राज्याचा सन्मान वाढवला.
या पहिल्यावहिल्या राष्ट्रीय रोवर–रेंजर कॅम्पमध्ये सहभागी होऊन विद्यार्थ्यांनी मिळवलेल्या यशाबद्दल आणि राज्यस्तरीय प्रतिनिधित्वाबद्दल शाळेत विशेष सत्कार करण्यात आला. विद्यार्थ्यांना मार्गदर्शन करणारे धोटे सर व आगवान मॅडम, तसेच सहभागी विद्यार्थ्यांचे प्राचार्य जे. डी. पठाण, उपप्राचार्य कु. गुरनुले आणि पर्यवेक्षक एस. जी. राघोर्ते यांनी पुष्पगुच्छ देऊन अभिनंदन केले.
या यशामुळे सरस्वती विद्यालय व कनिष्ठ महाविद्यालयाच्या शैक्षणिक व सहशैक्षणिक कार्याचा लौकिक राष्ट्रीय स्तरावर अधोरेखित झाला असून, विद्यार्थ्यांच्या सर्वांगीण विकासासाठी अशा उपक्रमांचे महत्त्व अधिक ठळक झाले आहे.