🔴 सनफ्लॅग कंपनीत भीषण अपघात; 60 फूट उंचीवरून पडून क्रेन ऑपरेटरचा मृत्यू गेटसमोर चार तास मृतदेह ठेवून कामगारांचे आंदोलन कुटुंबीयांसह शेकडो ग्रामस्थ रस्त्यावर

मोहाडी | प्रतिनिधी
मोहाडी तालुक्यातील सनफ्लॅग पोलाद कारखान्यात काम करत असताना झालेल्या भीषण अपघातात क्रेन ऑपरेटरचा दुर्दैवी मृत्यू झाल्याची घटना घडली. या घटनेच्या निषेधार्थ संतप्त कामगार व ग्रामस्थांनी कारखान्याच्या मुख्य गेटसमोर मृतदेह ठेवून तब्बल चार तास आंदोलन केले.
मृत कामगाराचे नाव मारोती महादेव भिवगडे (वय 45), रा. पाचगाव असे असून, ही घटना 17 जानेवारी रोजी सकाळी सुमारे 10 वाजताच्या सुमारास सनफ्लॅग कारखान्यातील एसएमएस विभागात घडली.
अपघात कसा घडला?
नेहमीप्रमाणे कामावर आलेले मारोती भिवगडे क्रेन ऑपरेट करण्यासाठी पायऱ्या चढत असताना सुमारे 60 फूट उंचीवरून खाली कोसळले. गंभीर जखमी अवस्थेत त्यांना तातडीने लक्ष हॉस्पिटल येथे नेण्यात आले; मात्र डॉक्टरांनी त्यांना मृत घोषित केले.
एकमेव कमावता गेल्याने कुटुंबावर संकट
मारोती भिवगडे हे कुटुंबातील एकमेव कमावते सदस्य होते. त्यांच्या पश्चात पत्नी अर्चना (गृहिणी), मुलगी सिमरन (18) आणि मुलगा सुमित (16, इयत्ता अकरावी) असा परिवार आहे. मृतकाकडे पाचगाव येथे सुमारे एक एकर शेती असूनही, कुटुंबाची मुख्य उपजीविका कारखान्यातील नोकरीवरच अवलंबून होती.
सुरक्षेअभावी अपघात झाल्याचा आरोप
सनफ्लॅगसारख्या मोठ्या औद्योगिक प्रकल्पात कामगार सुरक्षेबाबत गंभीर दुर्लक्ष होत असल्याचा आरोप ग्रामस्थांनी केला. वारंवार होणाऱ्या अपघातांनंतरही व्यवस्थापन कोणतीही ठोस सुरक्षा व्यवस्था राबवत नसल्याने हा नाहक बळी गेला, असा रोष व्यक्त करण्यात आला.
नुकसानभरपाईसाठी आंदोलन
दुपारी सुमारे 1 वाजता पाचगाव व वरठी परिसरातील ग्रामस्थांनी सनफ्लॅगच्या मुख्य गेटसमोर मृतदेह ठेवून आंदोलन सुरू केले.
आंदोलनात एक कोटी रुपये नुकसानभरपाई,
मृतकाच्या कुटुंबातील एका सदस्याला तात्काळ नोकरी,
तसेच मुलाला वय पूर्ण झाल्यावर नोकरी
अशा मागण्या करण्यात आल्या.
पाचगावचे सरपंच संतूलाल गजभिये, उपसरपंच व मोठ्या संख्येने ग्रामस्थ आंदोलनात सहभागी झाले.
राजकीय नेत्यांची उपस्थिती; आंदोलन अधिक तीव्र
माहिती मिळताच आमदार राजू कारेमोरे, माजी आमदार चरण वाघमारे आंदोलनस्थळी दाखल झाले. यावेळी सनफ्लॅग व्यवस्थापनाविरोधात जोरदार घोषणाबाजी करण्यात आली.
पोलीस व प्रशासनाचा हस्तक्षेप
परिस्थिती तणावपूर्ण होत असल्याने जिल्ह्यातील विविध पोलीस ठाण्यांचे अधिकारी मोठ्या बंदोबस्तासह घटनास्थळी दाखल झाले.
पोलीस उपनिरीक्षक अभिजित पाटील यांच्या मध्यस्थीने आंदोलनकर्ते व सनफ्लॅग व्यवस्थापनात चर्चा सुरू झाली.
व्यवस्थापनाकडून दिलेले आश्वासन
चर्चेनंतर सनफ्लॅग व्यवस्थापनाकडून पुढील बाबी मान्य करण्यात आल्या—
मृतकाच्या कुटुंबातील एका सदस्याला नोकरी
विविध मार्गांतून मिळून सुमारे 30 लाख रुपयांची मदत
मृतकाच्या मुलाच्या आयटीआय किंवा पॉलिटेक्निक शिक्षणासाठी मदत
तात्काळ 2 लाख रुपये सानुग्रह अनुदान
ही आश्वासने व्यवस्थापनाचे प्रतिनिधी रामचंद्र दळवी यांनी लेखी स्वरूपात दिली.
आमदारांचा व्यवस्थापनावर ताशेरे
आमदार राजू कारेमोरे यांनी दिलेली मदत अपुरी असल्याचे सांगत सनफ्लॅग व्यवस्थापन व कामगार संघटनेच्या भूमिकेवर तीव्र नाराजी व्यक्त केली. माजी आमदार चरण वाघमारे यांनीही मृत कामगाराच्या कुटुंबाला अधिक भरीव मदत देण्याची मागणी केली.
आंदोलनाची सांगता
सनफ्लॅग व्यवस्थापनाने मान्य केलेल्या मागण्यांचे लेखी पत्र मृतकाच्या कुटुंबाला देण्यात आल्यानंतर सायंकाळी सुमारे 5 वाजता मृतदेह अंत्यविधीसाठी उचलण्यात आला. यावेळी मोठा पोलीस बंदोबस्त तैनात होता.

संकलन:- अमर वासनिक, न्यूज एडिटर, पोलिस योद्धा न्यूज नेटवर्क