🔴 पवनीत रेतीचोरीवर पोलिसांची कारवाई; दोन टिप्पर जप्त, चालक-मालकांवर गुन्हा दाखल

पवनी | प्रतिनिधी
पवनी पोलीस स्टेशन हद्दीत अवैध रेती वाहतुकीविरोधात पोलिसांनी प्रभावी कारवाई करत रेतीचोरीचा गंभीर प्रकार उघडकीस आणला आहे. विनापरवाना व पासशिवाय रेतीची चोरटी वाहतूक करणाऱ्या दोन टिप्परवर कारवाई करण्यात आली असून चालक व मालकांविरोधात फौजदारी गुन्हा नोंद करण्यात आला आहे.
सविस्तर माहिती अशी की, स्थागुशा भंडारा येथील पोलीस पथक पवनी परिसरात पेट्रोलिंग करीत असताना मौजा नायरा पेट्रोलपंप, नवीन बस स्टँड पवनी समोरील रोडवर संशयास्पदरीत्या रेती वाहतूक सुरू असल्याचे निदर्शनास आले.
या ठिकाणी—
टिप्पर क्रमांक MH-49 BZ-1717 चा चालक कैसर अली रियाझउद्दीन शेख (वय 47, रा. गरीब नवाज चौक, खरबी, नागपूर)
वरील टिप्परचा मालक
टिप्पर क्रमांक MH-40 BL-2845 चा फरार चालक
वरील टिप्परचा मालक
हे सर्व विनापास-परवाना अवैधरीत्या रेतीची चोरटी वाहतूक करताना मिळून आले.
सदर बाब तहसीलदार साहेब, तहसील कार्यालय पवनी यांना कळविण्यात आली. त्यानंतर तलाठी सचिन आनंदराव आगलावे (वय 40, रा. तहसील कार्यालय, पवनी) यांनी ग्राम पवनी येथे दोन्ही टिप्परमधील रेतीचा जप्ती पंचनामा करून कारवाई केली. त्यानंतर स्वतः पोलीस स्टेशन पवनी येथे हजर राहून लेखी तक्रार दाखल केली.
या तक्रारीवरून पोलीस स्टेशन पवनी येथे अपराध क्रमांक 06/2026 अन्वये
कलम 303(2), 3(5) भारतीय न्याय संहिता तसेच कलम 48(7), 48(8)(2) महाराष्ट्र जमीन महसूल अधिनियम 1966 अंतर्गत संबंधित टिप्परचे चालक व मालकांविरोधात फौजदारी गुन्हा नोंद करण्यात आला आहे.
या प्रकरणाचा पुढील तपास पोलीस हवालदार फळणीकर (ब.नं. 93) करीत असून, अवैध रेती उत्खनन व वाहतुकीविरोधात प्रशासनाकडून पुढेही कठोर भूमिका घेतली जाणार असल्याचे स्पष्ट करण्यात आले आहे.