🔴 तुमसर येथे निर्दय गोवंश वाहतूक व अपघाताची थरारक घटना पिकअप वाहनाने कार, पानठेला व अ‍ॅक्टिव्हाला धडक; ५ म्हशींची सुटका, गुन्हा दाखल

तुमसर | प्रतिनिधी
तुमसर पोलीस स्टेशन हद्दीत प्राण्यांना क्रूरतेने वागविण्याचा गंभीर प्रकार उघडकीस आला असून, अवैध व निर्दय गोवंश वाहतुकीदरम्यान घडलेल्या अपघातात लाखो रुपयांचे नुकसान झाले आहे. या प्रकरणी पिकअप वाहनचालक व मालकाविरोधात विविध कलमान्वये गुन्हा दाखल करण्यात आला आहे.
या प्रकरणातील फिर्यादी शंकर लक्ष्मीपती किनेर (वय ३३, रा. संत रविदास वार्ड, प्रगती नगर, तिरोडा, जि. गोंदिया) हे आयुर्वेदिक औषधोपचाराचे काम करतात. दिनांक ९ जानेवारी २०२६ रोजी सकाळी १० ते १०.२० वाजताच्या सुमारास ते तुमसर येथील रुग्णावर उपचार करून आपल्या टोयोटा ग्लांजा (क्र. MH-35-A-8426) कारने तिरोड्याकडे जात असताना माडगी चौक, तुमसर येथे हा प्रकार घडला.
समोरून येणाऱ्या ब्युलोरो पिकअप वाहन (क्र. MH-35-G-4503) च्या चालकाने भरधाव वेगात व निष्काळजीपणे वाहन चालवत फिर्यादीच्या कारच्या डाव्या हेडलाईटला जोरदार धडक दिली. यामुळे कारचे सुमारे ₹५०,००० रुपयांचे नुकसान झाले. धडकेनंतर नियंत्रण सुटलेल्या पिकअपने रस्त्यालगतचा बंद पानठेला उडवून दिला, ज्यामुळे सुमारे ₹१५,००० चे नुकसान झाले. तसेच बाजूला उभी असलेली अ‍ॅक्टिव्हा मोपेड (क्र. MH-49-5988) यालाही धडक देत सुमारे ₹३०,००० रुपयांचे नुकसान केले.
अपघातानंतर पोलिसांनी घटनास्थळी पंचनामा करत पिकअप वाहनाची तपासणी केली असता, त्या वाहनाच्या डाल्यात ५ काळ्या रंगाच्या म्हशी प्रत्येकी अंदाजे ₹२५,००० किमतीच्या, एकूण ₹१,२५,००० रुपयांच्या, कोणतीही चारा-पाणी व्यवस्था न करता दाटीने कोंबून निर्दयतेने वाहतूक केली जात असल्याचे आढळून आले. पिकअप वाहनाची किंमत अंदाजे ₹३ लाख इतकी आहे.
या प्रकरणी पोलीस स्टेशन तुमसर येथे अपराध क्रमांक १८/२०२६ अंतर्गत भा.न्या.सं. कलम २८१, ३२४(४), मोटार वाहन कायदा कलम १८४ तसेच प्राण्यांना क्रूरतेने वागविण्यास प्रतिबंधक कायदा कलम ११(१)(ड) अन्वये पिकअप चालक शुभम लाळे (वय अंदाजे २५, रा. देव्हाडा, ता. मोहाडी, जि. भंडारा) व वाहनमालकाविरुद्ध गुन्हा दाखल करण्यात आला आहे.
या प्रकरणाचा पुढील तपास पोलीस हवालदार गावंडे (ब.नं. १५६८) करीत असून, अपघातास कारणीभूत ठरलेल्या वाहनचालकाच्या निष्काळजीपणामुळे नागरिकांच्या जीवितास धोका निर्माण झाला असल्याचेही तपासात नमूद करण्यात आले आहे.