🔴 कोंढाळी नगरपंचायतीत राजकीय समीकरणांना नवे वळण राष्ट्रवादी (शरद पवार) – काँग्रेसची संयुक्त “कोंढाळी नगर विकास आघाडी” स्थापन प्रज्वल धोटे गटनेते, विनोद माकोडे उपगटनेते, राहुल नासरे प्रतोद विकासकामांना मिळणार नवी गती; स्थिर प्रशासनाचा विश्वास

कोंढाळी | प्रतिनिधी :
डिसेंबर २०२५ मध्ये पार पडलेल्या कोंढाळी नगरपंचायत निवडणुकीनंतर राजकीय हालचालींना वेग आला असून, राष्ट्रवादी काँग्रेस (शरदचंद्र पवार गट) आणि भारतीय राष्ट्रीय काँग्रेस यांनी एकत्र येत नगरपंचायतीत संयुक्त अधिकृत गटाची स्थापना केली आहे. दिनांक १२ जानेवारी २०२६ रोजी या सहा नगरसेवकांनी एकमताने “कोंढाळी नगर विकास आघाडी” या नावाने अधिकृत गट स्थापन करत राजकीय स्थैर्य व विकासाभिमुख वाटचालीचा निर्धार व्यक्त केला.
या आघाडीमध्ये राष्ट्रवादी काँग्रेस (श.प.)चे चार तर काँग्रेसचे दोन नगरसेवक सहभागी असून, गटाची सविस्तर नियमावली (संविधान) सर्व सदस्यांच्या संमतीने मंजूर करण्यात आली आहे. त्यानुसार प्रमुख पदाधिकाऱ्यांची निवड पुढीलप्रमाणे करण्यात आली—
🔹 नवगठित गटाचे प्रमुख पदाधिकारी
गटनेते : प्रज्वल धोटे (राष्ट्रवादी काँग्रेस – शरदचंद्र पवार)
उपगटनेते : विनोद माकोडे (भारतीय राष्ट्रीय काँग्रेस)
प्रतोद (व्हीप) : राहुल नासरे (राष्ट्रवादी काँग्रेस – शरदचंद्र पवार)
📜 नियमावली स्पष्ट, शिस्त कडक
गटाच्या संविधानानुसार सर्व निर्णय लोकशाही पद्धतीने बहुमताने घेतले जातील व ते सर्व सदस्यांवर बंधनकारक राहतील. गटाच्या निर्णयाचे उल्लंघन करणाऱ्या सदस्यावर अपात्रतेची कारवाई करण्याची तरतूदही स्पष्टपणे करण्यात आली आहे. तसेच, या गटातील राष्ट्रवादी (श.प.) व काँग्रेसचे सर्व नगरसेवक आपल्या मूळ पक्षाशी निष्ठावान राहतील, अशी ग्वाही देण्यात आली आहे.
🏛️ वैधानिक मान्यतेसाठी कागदपत्रे सादर
या संयुक्त गटाला वैधानिक मान्यता मिळावी, यासाठी आवश्यक सर्व कागदपत्रे नागपूर जिल्हाधिकारी डॉ. विपिन इटनकर यांच्यासमोर सादर करण्यात आली आहेत.
🤝 नेतृत्वाची उपस्थिती, राजकीय ताकदीचे प्रदर्शन
यावेळी काँग्रेसचे प्रदेश पदाधिकारी प्रकाश वसु, ज्येष्ठ नेते बाळासाहेब जाधव, राष्ट्रवादी (श.प.) कोंढाळी शहराध्यक्ष संजय राऊत, जिल्हा उपाध्यक्ष स्वप्निल व्यास, अतुल नारनवरे, लक्ष्मीकांत ठवळे, अमोल जुनघरे, तसेच काँग्रेसचे कुणाल भांगे, प्रशांत डेहनकर, वैभव दुधे, अंकित चव्हाण, भूषण चांडक यांच्यासह नवनिर्वाचित नगरसेवक प्रज्वल धोटे, विनोद माकोडे, राहुल नासरे, शेख बंदेरेहमान, आम्रपाली नारनवरे, सनोबर शेख आदी मान्यवर उपस्थित होते.
🚧 “सबका साथ – नगरपंचायतीचा सर्वांगीण विकास”
“सबका साथ—नगरपंचायतीचा सर्वांगीण विकास” हे ध्येय समोर ठेवून ही आघाडी काम करणार असल्याचे यावेळी स्पष्ट करण्यात आले. शहरातील मूलभूत सुविधा, पायाभूत विकास, नागरी समस्या आणि जनहिताच्या प्रश्नांवर एकसंघपणे निर्णय घेण्याचा विश्वास या गटाने व्यक्त केला आहे.
राजकीय वर्तुळात कोंढाळी नगरपंचायतीत स्थिर प्रशासन आणि जलद विकासाच्या दिशेने टाकलेले महत्त्वाचे पाऊल म्हणून या गटाच्या स्थापनेकडे पाहिले जात असून, येत्या काळात याचे परिणाम नगरविकासात दिसून येतील, अशी अपेक्षा व्यक्त होत आहे.