📰 साकोली तालुक्यात अवकाळी पावसाने धानपिकाचा चुराडा – शेतकऱ्यांचा संसार उद्ध्वस्त “सरकारने तात्काळ मदत जाहीर करावी, आम्हाला सर्वे नव्हे तर आधार हवा” – शेतकऱ्यांची आर्त हाक

भंडारा (प्रतिनिधी) : भंडारा जिल्ह्यातील साकोली तालुक्यात गेल्या तीन दिवसांपासून सुरू असलेल्या अवकाळी पावसाने शेतकऱ्यांचे जगणे अक्षरशः उद्ध्वस्त केले आहे. आभाळ फाटून कोसळलेल्या पावसाने धानपिकाचे मोठ्या प्रमाणात नुकसान झाले असून शेतकऱ्यांच्या मेहनतीचे पीक चिखलात मिसळले आहे.

शिवनी, बान, सानगडी, साखरा, कटंथरा, झाडगाव, कुमली या गावांमध्ये धानपिकावर ढगांचा सावट दाटले आहे. काही ठिकाणी पिकं भुईसपाट झाली असून, काही ठिकाणी पिकांनाच अंकुर फुटले आहेत. अख्खा हंगाम कष्टानं पार पाडलेल्या शेतकऱ्यांसाठी ही नैसर्गिक आपत्ती म्हणजे काळाचा आघातच ठरला आहे.

शेतकऱ्यांच्या डोळ्यांत आज फक्त पावसाचं पाणी नाही, तर त्यांच्या स्वप्नांचाही पूर वाहतो आहे. पावसाने केलेल्या विध्वंसानं अनेक कुटुंबांचं जगणंच ढासळलं आहे.

स्थानिक प्रशासनाकडून पंचनामे सुरू झाले असले तरी शेतकऱ्यांची मागणी स्पष्ट आहे —
👉 “प्रति हेक्टर किमान ५० हजार रुपयांची मदत तात्काळ जाहीर करा!”

शेतकऱ्यांचा हा आवाज आता प्रशासन आणि सत्ताधाऱ्यांपर्यंत पोहोचावा, अशी अपेक्षा आहे. साकोली व आसपासच्या शेतकऱ्यांनी मुख्यमंत्री, विरोधी पक्षनेते आणि आमदारांना थेट आवाहन केले आहे —

> “सरकार असो की विरोधक, जबाबदारी सर्वांची आहे. आम्हाला घोषणा नकोत, थेट मदत हवी आहे.”

विशेष म्हणजे शेतकरी नेते आणि कार्यकर्त्यांनी प्रफुल पटेल, नाना पटोले, वडीवार यांच्यासारख्या लोकप्रतिनिधींना थेट उद्देशून सांगितले —

> “बोनस जाहीर झाल्यावर बॅनर लावणारे चेले दिसतात, पण आता जेव्हा शेतकऱ्यांच्या घरात काळोख पसरला आहे, तेव्हा तुम्ही कुठे आहात?”

शेतकऱ्यांची मागणी साधी पण तातडीची आहे —
“कोणताही सर्वे करू नका, थेट ₹५०,००० हेक्टरप्रमाणे मदत द्या.”

अवकाळी पावसाने उद्ध्वस्त झालेल्या या भूमिपुत्रांच्या डोळ्यांत आज आशा नाही, तर प्रश्न आहेत —
“आमचं आयुष्य पुन्हा उभं राहील का?”

👉 सरकारने या वेदनेला न्याय दिला नाही, तर शेतकऱ्यांचा विश्वास पुन्हा निर्माण होणार नाही, ही वस्तुस्थिती आहे.

✍️ संकलन – अमर वासनिक, न्यूज एडिटर
पोलिस योद्धा न्यूज नेटवर्क
“आवाज जनसामान्यांचा”