🎬 साकोलीत रेती चोरीवर जोरदार कारवाई; बिना नंबर ट्रॅक्टरसह ७.०६ लाखांचा मुद्देमाल जप्त, दोघांवर गुन्हा दाखल

🎬 साकोलीत रेती चोरीवर जोरदार कारवाई; बिना नंबर ट्रॅक्टरसह ७.०६ लाखांचा मुद्देमाल जप्त, दोघांवर गुन्हा दाखल
साकोली | प्रतिनिधी
साकोली तालुक्यात अवैध रेती चोरीविरोधात पोलिसांनी धडक कारवाई करत रेती तस्करांचे मनसुबे उधळून लावले आहेत. कुंभली–मोहगाटा मार्गावर रात्रीच्या सुमारास करण्यात आलेल्या कारवाईत बिना नंबरचा ट्रॅक्टर, ट्रॉली आणि अवैध रेती असा एकूण ७ लाख ०६ हजार रुपयांचा मुद्देमाल जप्त करण्यात आला असून, दोन आरोपींविरोधात गुन्हा दाखल करण्यात आला आहे.
दि. 23 डिसेंबर 2025 रोजी रात्री 8.30 वाजता, मौजा कुंभली ते मोहगाटा जाणाऱ्या डांबरी रस्त्यावर, सुमारे 08 किमी पश्चिम अंतरावर पोलीस गस्त सुरू असताना ही कारवाई करण्यात आली. यावेळी आरोपी
रोहित रामेश्वर निंबार्ते (वय 24 वर्षे)
रामेश्वर काशिराम निंबार्ते (वय अंदाजे 50 वर्षे)
दोन्ही रा. मुंडिपार सडक, ता. साकोली, जि. भंडारा,
हे लाल रंगाच्या, बिना नंबरच्या महिंद्रा कंपनीच्या ट्रॅक्टरमध्ये अंदाजे 01 ब्रास अवैध रेती चोरून वाहतूक करताना आढळून आले.
पंचासमक्ष तपासणीदरम्यान ट्रॅक्टरचा इंजिन क्रमांक (TNHL01116) निष्पन्न झाला. ट्रॅक्टर व ट्रॉलीची अंदाजे किंमत 7,00,000 रुपये, तर ट्रॉलीत भरलेली रेती 6,000 रुपये अशी एकूण 7,06,000 रुपयांची जप्ती करण्यात आली.
या प्रकरणी फिर्यादी पो. हवा. प्रमोद विश्वनाथ बागडे (ब.नं. 861) यांच्या लेखी तक्रारीवरून पोलीस स्टेशन साकोली येथे कायम अप. क्र. 704/2025 दाखल करण्यात आला आहे. आरोपींविरोधात कलम 305(ई), 49 भारतीय न्याय संहिता 2023 अंतर्गत गुन्हा नोंदविण्यात आला असून, पुढील तपास पो. ना. मंगेश खुळसाम करीत आहेत.
🚨 अवैध रेती चोरी करणाऱ्यांवर कठोर कारवाई सुरूच राहणार असून, कायदा मोडणाऱ्यांना कोणतीही सवलत दिली जाणार नाही, असा स्पष्ट इशारा साकोली पोलिसांनी दिला आहे.

संकलन:- अमर वासनिक, न्यूज एडिटर, पोलिस योद्धा न्यूज नेटवर्क