🎬 माडवीत संध्याकाळी रेतीचोरीचा पर्दाफाश — सिहोरा पोलिसांची कारवाई; ट्रॅक्टर-ट्रॉलीसह १ ब्रास रेती जप्त

सिहोरा | प्रतिनिधी

तुमसर तालुक्यातील माडवी गावात अवैध रेती वाहतुकीचा प्रकार उघडकीस येताच प्रशासनाने धडक कारवाई करत पर्यावरणाच्या ऱ्हासाला आळा घालण्याचा इशारा दिला आहे. संध्याकाळच्या सुमारास सुरू असलेल्या रेतीचोरीवर सिहोरा पोलिस व महसूल विभागाने संयुक्त कारवाई करत ट्रॅक्टर-ट्रॉलीसह एकूण ५.०६ लाख रुपयांचा मुद्देमाल जप्त केला आहे.

दि. २७ नोव्हेंबर २०२५ रोजी सायंकाळी ७.४५ ते ८.०० वाजताच्या दरम्यान, ग्राम महसूल अधिकारी श्री. खेमेंद्र दुलीचंद सोनवाने (रा. तुमसर, वाहनी) हे आपल्या स्टाफसह गौण खनिज उत्खनन व वाहतूक प्रतिबंधासाठी पेट्रोलिंग करीत असताना मौजा माडवी येथे संशयास्पद ट्रॅक्टर आढळून आला.

तपासाअंती आशिष देवराव बुधे (रा. कर्कापूर, पो. मोहगाव खदान, ता. तुमसर, जि. भंडारा) हा आरोपी हिरव्या रंगाच्या ट्रॅक्टर (क्र. डभ् 36 एल 0213) व विना क्रमांक ट्रॉलीद्वारे शासनाच्या अधिकार क्षेत्रातील विना पास-परवाना एक ब्रास रेतीची अवैध वाहतूक करत असल्याचे निष्पन्न झाले.

सदर ट्रॅक्टर-ट्रॉलीची अंदाजे किंमत ५ लाख रुपये, तर ट्रॉलीतील १ ब्रास रेतीची किंमत सुमारे ६ हजार रुपये असून एकूण ५,०६,००० रुपयांचा मुद्देमाल मौका पंचनामा व जप्ती पंचनाम्यान्वये ताब्यात घेऊन तहसील कार्यालय, तुमसर येथे डिटेन करण्यात आला आहे.

या प्रकरणी फिर्यादीच्या लेखी रिपोर्टवरून पोलीस स्टेशन सिहोरा येथे अपराध क्रमांक ३०२/२०२५ अन्वये भारतीय न्याय संहिता कलम ३०५ (ई), महाराष्ट्र जमीन महसूल अधिनियम कलम ४८ (७), (८) तसेच पर्यावरण संरक्षण अधिनियम कलम ७ व ९ अंतर्गत गुन्हा नोंद करण्यात आला आहे.

या प्रकरणाचा पुढील तपास पोलीस निरीक्षक कसोधन हे करीत असून, अवैध रेतीचोरीविरोधात कठोर कारवाई सुरूच राहणार असल्याचा इशारा प्रशासनाने दिला आहे.

—

संकलन:- अमर वासनिक, न्यूज एडिटर, पोलिस योद्धा न्यूज नेटवर्क