🎬 तुमसरमध्ये एनडीपीएस अंतर्गत कारवाई; चिलममध्ये अमली पदार्थ सेवन करताना युवक रंगेहात पकडला

तुमसर | प्रतिनिधी
तुमसर तालुक्यात अमली पदार्थांविरोधातील मोहिमेला आणखी एक यश मिळाले असून, स्थानिक गुन्हे शाखा भंडाराच्या पथकाने एन.डी.पी.एस. कायद्यान्वये कारवाई करत सार्वजनिक ठिकाणी अमली पदार्थांचे सेवन करणाऱ्या युवकास रंगेहात पकडले आहे. या कारवाईमुळे तुमसर परिसरात खळबळ उडाली आहे.
दि. 24 डिसेंबर 2025 रोजी सायंकाळी 5.30 ते 6.30 दरम्यान पोलीस नाईक अंकोश ग्यानीराम पुराम (ब.नं.1207), स्थानिक गुन्हे शाखा भंडारा, हे आपल्या पथकासह तुमसर शेतशिवारात डोंगरालगत नाल्याच्या शेजारी, सुमारे 3 किमी उत्तर परिसरात पेट्रोलिंग करीत असताना, सार्वजनिक ठिकाणी एक इसम संशयास्पदरीत्या चिलम ओढताना आढळून आला.
पंचासमक्ष व एन.डी.पी.एस. कायद्यातील सर्व तरतुदींचे काटेकोर पालन करून आरोपीची अंगझडती घेण्यात आली. यावेळी आरोपीच्या ताब्यातून
एक चिनी मातीची चिलम (राखेसह),
एक मॅचिसची डबी,
एक सुती कापडी तुकडा
असा मुद्देमाल जप्त करण्यात आला.
अटक करण्यात आलेल्या आरोपीचे नाव निरजकुमार उर्फ राजा रामखिलावन यादव (वय 23 वर्षे, रा. डमरू, बलोदाबाजार, छत्तीसगड) असे असून, त्याची वैद्यकीय तपासणी करून रक्तनमुना (ब्लड सॅम्पल) देखील घेण्यात आला आहे.
या प्रकरणी आरोपीविरुद्ध कलम 27 एन.डी.पी.एस. कायदा अंतर्गत पोलीस स्टेशन तुमसर येथे गुन्हा क्रमांक 814/2025 नोंद करण्यात आला आहे. पुढील तपास श्रेणी पोलीस उपनिरीक्षक शहारे (पो.स्टे. तुमसर) करीत आहेत.
🚨 अमली पदार्थांविरोधात पोलीस प्रशासनाची कारवाई अधिक तीव्र होत असल्याचे या घटनेतून स्पष्ट झाले असून, सार्वजनिक ठिकाणी अमली पदार्थ सेवन करणाऱ्यांवर कठोर कारवाई केली जाईल, असा इशाराच पोलिसांनी दिला आहे.