“हा अपघात नसून घातपातच; ही धूक नाही, तर धोका आहे!” संघटनकुशल नेतृत्वाचा अस्त — अमोल मिटकरींसह शेकडो चाहत्यांनी अश्रूंनी दिला अजितदादांना निरोप

अकोला | प्रतिनिधी
अखिल भारतीय राष्ट्रवादी काँग्रेस (अजित पवार) पक्षाचे राष्ट्रीय अध्यक्ष तथा महाराष्ट्र राज्याचे उपमुख्यमंत्री, लोकनेते अजितदादा पवार यांच्या दुर्दैवी विमान दुर्घटनेने संपूर्ण महाराष्ट्रासह देश हादरून गेला आहे. दि. २८ जानेवारी २०२६ रोजी सकाळी ८.४० वाजता बारामती येथे झालेल्या विमान अपघातात अजितदादांचे अपघाती निधन झाल्याची बातमी समोर येताच सर्वत्र शोककळा पसरली.
या भीषण दुर्घटनेत अजितदादांसोबत त्यांचे सुरक्षारक्षक, दोन्ही वैमानिक तसेच विमानातील केअरटेकर यांचेही दुर्दैवी निधन झाले. राज्याच्या राजकीय इतिहासात हा काळा दिवस म्हणून नोंदला जात असून, जनतेच्या हृदयात खोलवर वेदना निर्माण झाल्या आहेत.
“हा अपघात नाही, घातपात आहे” – अमोल मिटकरी
या घटनेवर तीव्र शब्दांत प्रतिक्रिया देताना राष्ट्रवादी काँग्रेस (अजित पवार) पक्षाचे विधानपरिषद सदस्य आमदार अमोल मिटकरी यांनी,
“दादांचा मृत्यू हा अपघात नसून घातपात आहे. ही धूक नाही, तर धोका आहे,”
असे ठाम मत व्यक्त करत अजितदादांना अश्रूंनी निरोप दिला.
संघटनकुशल नेतृत्व, प्रशासनावर मजबूत पकड, आणि गडचिरोलीपासून कोकणाच्या टोकापर्यंत सामान्य जनतेच्या प्रश्नांची सखोल जाण असलेले नेतृत्व आज हरपले असल्याची भावना त्यांनी व्यक्त केली.
अकोल्यात भव्य शोकसभा; शिवसंभव निवासात भावनांचा उद्रेक
या अपूरणीय नुकसानीबद्दल शोक व्यक्त करण्यासाठी आमदार अमोल मिटकरी यांच्या पुढाकाराने अकोला येथील आरोग्य नगरातील शिवसंभव निवासाच्या प्रांगणात भव्य शोकसभेचे आयोजन करण्यात आले. या शोकसभेत अकोला शहर व जिल्ह्यातील शेकडो महिला-पुरुष पदाधिकारी, कार्यकर्ते, आजी-माजी लोकप्रतिनिधी आणि सर्वसामान्य नागरिक मोठ्या संख्येने उपस्थित होते.
श्रद्धांजली अर्पण करताना अनेकांच्या डोळ्यांत अश्रू तर मनात न भरून येणारे दुःख स्पष्टपणे दिसून येत होते.
“दादा गेले, पण त्यांचे विचार अमर आहेत”
“दादा गेले असतील, पण त्यांचे विचार, निर्णयक्षमता, जनतेशी असलेले नाते आणि विकासाची दृष्टी कधीही संपणार नाही,”
अशा भावना शोकसभेत उपस्थित मान्यवरांनी आपल्या मनोगतातून व्यक्त केल्या.
अस्थी कलश अकोल्यात दाखल; हजारो नागरिकांचे दर्शन
दि. ३ फेब्रुवारी २०२६ रोजी दिवंगत अजितदादा पवार यांचा पवित्र अस्थी कलश अकोल्यात दाखल झाला. आमदार अमोल मिटकरी यांच्या सूचनेनुसार व अजितदादांच्या मार्गदर्शनातून उभे राहिलेले, १३ जुलै २०२५ रोजी स्वतः अजितदादांच्या पादस्पर्शाने पावन झालेले आरोग्य नगर येथील शिवसंभव निवास व जनसंपर्क कार्यालयाच्या प्रांगणात अस्थी कलश लोकदर्शनासाठी ठेवण्यात आला.
अकोला पोलीस विभागामार्फत गुन्हे अन्वेषण शाखेचे उपविभागीय पोलीस अधिकारी शेळके तसेच सहाय्यक पोलीस निरीक्षकांच्या उपस्थितीत अस्थी कलशाचे अंत्यदर्शन पार पडले.
या वेळी अकोला जिल्ह्यातील सर्व तालुक्यांतील राष्ट्रवादी काँग्रेस पक्षाचे महिला-पुरुष पदाधिकारी, ज्येष्ठ नेते, शिवसंभव प्रतिष्ठानचे पदाधिकारी, आरोग्य नगरातील नागरिक तसेच सर्व पक्षांतील अजितदादांवर प्रेम करणारे कार्यकर्ते मोठ्या संख्येने उपस्थित होते. सायंकाळपर्यंत श्रद्धांजली अर्पणासाठी नागरिकांची रांग लागली होती.
अजितदादा कायम स्मरणात
कठोर पण लोकाभिमुख नेतृत्व, ठाम निर्णयक्षमता आणि सामान्य कार्यकर्त्याशी असलेली आपुलकी पिढ्यान्‌पिढ्या राष्ट्रवादी काँग्रेसच्या कार्यकर्त्यांना प्रेरणा देत राहील, अशी भावना संपूर्ण शोकसभेतून व्यक्त झाली. अखेरीस दोन मिनिटांचे मौन पाळून दिवंगत आत्म्यांना भावपूर्ण श्रद्धांजली अर्पण करण्यात आली.
🕊️ भावपूर्ण श्रद्धांजली…
आदरणीय दादा, आपण सदैव आमच्या — महाराष्ट्राच्या हृदयात जिवंत राहाल.

संकलन:- श्री राजकुमार खोब्रागडे, मुख्य संपादक तथा डायरेक्टर