श्री क्षेत्र भीमाशंकर मंदिर तीन महिन्याकरिता बंद भाविकांनी सहकार्य करण्याचे पुणे जिल्हाधिकाऱ्यांचे आवाहन

पुणे, दि. 27 — बारा ज्योतिर्लिंगांपैकी एक असलेल्या पवित्र श्री क्षेत्र भीमाशंकर मंदिराच्या सर्वांगीण विकासासाठी महत्त्वपूर्ण निर्णय घेण्यात आला आहे. मंदिरातील सभामंडप व पायरी मार्गाच्या बांधकामासह भाविकांची सुरक्षितता लक्षात घेता, दि. 9 जानेवारी 2026 पासून पुढील तीन महिन्यांसाठी (महाशिवरात्रीचा कालावधी वगळून) मंदिर दर्शनासाठी बंद ठेवण्याचा निर्णय श्री क्षेत्र भीमाशंकर देवस्थान संस्थानने घेतला आहे.
भाविकांनी या निर्णयास सहकार्य करावे, असे आवाहन जिल्हाधिकारी तथा जिल्हादंडाधिकारी जितेंद्र डूड्डी यांनी केले आहे.
राज्य शासनाने श्री क्षेत्र भीमाशंकर मंदिराच्या विकासासाठी विशेष विकास आराखडा मंजूर केला असून, त्यातील अत्यंत महत्त्वाच्या टप्प्याची अंमलबजावणी सुरू होत आहे. प्रत्यक्ष बांधकामाच्या काळात भाविकांची सुरक्षितता अबाधित राखणे, तसेच कामे नियोजनबद्ध व कालमर्यादेत पूर्ण करणे, या उद्देशाने हा निर्णय घेण्यात आला आहे.
दि. 23 डिसेंबर रोजी जिल्हा प्रशासन, देवस्थान संस्थानचे विश्वस्त, स्थानिक दुकानदार व भीमाशंकर ग्रामस्थ यांच्या उपस्थितीत झालेल्या संयुक्त बैठकीत सर्वांच्या सहमतीने मंदिर तात्पुरते बंद ठेवण्याचा निर्णय घेण्यात आला.
महाशिवरात्रीच्या कालावधीत (12 ते 18 फेब्रुवारी 2026) मात्र भाविकांसाठी मंदिर दर्शनासाठी खुले राहणार आहे.
सन 2027 मध्ये नाशिक-त्र्यंबकेश्वर येथे होणाऱ्या सिंहस्थ कुंभमेळ्याच्या पार्श्वभूमीवर लाखो भाविक भीमाशंकर येथे दर्शनासाठी येण्याची शक्यता आहे. त्या अनुषंगाने आवश्यक पायाभूत सुविधा, सुरक्षित प्रवेश-निर्गमन व्यवस्था व गर्दी नियंत्रणाची कामे वेळेत पूर्ण करणे प्रशासनाचे प्रमुख उद्दिष्ट आहे.
मंदिर दर्शनासाठी बंद असले तरी श्री भीमाशंकर यांची नित्य पूजाअर्चा, अभिषेक व धार्मिक विधी परंपरेनुसार नियमित सुरू राहणार आहेत. मात्र या कालावधीत भाविकांना थेट दर्शनासाठी मंदिर परिसरात प्रवेश दिला जाणार नाही. बांधकाम यंत्रणा, अधिकृत अधिकारी-कर्मचारी व स्थानिक ग्रामस्थ वगळता अन्य कोणालाही परिसरात प्रवेश दिला जाणार नाही.
“श्री क्षेत्र भीमाशंकर मंदिराचा विकास हा दीर्घकालीन सुरक्षितता, सुविधा आणि भाविकांच्या सोयीसाठी अत्यंत आवश्यक आहे. सिंहस्थ कुंभमेळ्याच्या पार्श्वभूमीवर ही कामे वेळेत पूर्ण होण्यासाठी भाविकांनी, स्थानिक नागरिकांनी मंदिर संस्थान व प्रशासनास पूर्ण सहकार्य करावे,” असे आवाहन जिल्हाधिकारी जितेंद्र डूड्डी यांनी केले आहे.