मोहाडी नगरपंचायतीचा व्यापाऱ्यांवर ‘मनमानी’ प्रहार? २५ दुकानांना ठोकले बेकायदेशीर टाळे!

व्यापाऱ्यांचा संताप; नगर विकास संघर्ष समितीसह पोलिसांत धाव; आमदार राजू कारेमोरे यांच्या मध्यस्थीनंतर तोडगा निघणार?
​मोहाडी (ब्युरो रिपोर्ट): नेहमीच आपल्या वादग्रस्त आणि मनमानी कारभारासाठी चर्चेत असलेल्या मोहाडी नगरपंचायतीने पुन्हा एकदा नवा वाद ओढवून घेतला आहे. थकीत मालमत्ता कराच्या वसुलीसाठी नगरपंचायतीने शहरातील २५ व्यापाऱ्यांच्या दुकानांना अचानक टाळे ठोकून ती सील केली. नगरपंचायतीची ही कारवाई पूर्णपणे बेकायदेशीर आणि व्यापाऱ्यांवर अन्याय करणारी असल्याचा आरोप करत, व्यापाऱ्यांनी मोहाडी पोलीस स्टेशनमध्ये धाव घेतली आहे.

​🚨 काय आहे मुख्य वाद?
​मोहाडी नगरपंचायतीने मालमत्ता कर थकीत असलेल्या व्यापाऱ्यांविरुद्ध २९ मार्च रोजी धडक मोहीम राबवली. मात्र, नगर विकास संघर्ष समितीचे बबलू सय्यद यांनी असा आरोप केला आहे की, नियमानुसार व्यापाऱ्यांना तीन नोटीस देणे बंधनकारक असताना कोणतीही पूर्वसूचना न देता ही कारवाई करण्यात आली. तसेच, दुकाने सील करण्यासाठी कोर्टाचे कोणतेही आदेश नव्हते, तरीही नगरपंचायतीने सत्तेचा गैरवापर केला, असे व्यापाऱ्यांचे म्हणणे आहे.

​🚨 आमदार राजू कारेमोरे यांची मध्यस्थी
​कारवाईमुळे व्यापाऱ्यांमध्ये तीव्र रोष निर्माण झाल्याचे पाहून आमदार राजू कारेमोरे यांनी या प्रकरणात मध्यस्थी केली. त्यांनी नगरपंचायत प्रशासनाशी चर्चा करून व्यापाऱ्यांवर अन्याय होऊ नये आणि तात्काळ योग्य तो तोडगा काढण्याच्या सूचना दिल्या. यावेळी जि.प. सभापती नरेश इळकरकर आणि स्थानिक नगरसेवक देखील उपस्थित होते.

​🚨 प्रशासनाची आणि पोलिसांची भूमिका
​मुख्याधिकारी निलेश इंगोले: “मालमत्ता कर थकीत असल्याने नियमानुसार कारवाई केली आहे. काही व्यापाऱ्यांनी शासकीय कामात अडथळा आणला असून, त्यांच्यावर पोलिसांत तक्रार दाखल केली जाईल,” असे त्यांनी स्पष्ट केले.

​पोलीस निरीक्षक सुरेंद्र बेलखेडे: “व्यापाऱ्यांच्या तक्रारीनुसार नगरपंचायतीने केलेल्या कारवाईची तांत्रिक माहिती घेऊन आणि वरिष्ठ कार्यालयाशी चर्चा करून पुढील तपास केला जाईल,” असे त्यांनी सांगितले.
​सध्या दुकानावरील सील काढण्यात आले असून व्यापाऱ्यांमध्ये तात्पुरते समाधानाचे वातावरण असले तरी, नगरपंचायतीच्या या भूमिकेमुळे मोहाडीत तणावाचे वातावरण कायम आहे.

​वृत्त संकलन: अमर वासनिक
न्यूज एडिटर, पोलीस योद्धा न्यूज नेटवर्क
📢 वेबमीडिया: www.policeyoddha.com
📞 बातम्या व जाहिरातीसाठी संपर्क: ७७७४९८०४९१