भंडारा जिल्ह्यात पोलिसांचा ‘क्लीन स्वीप’; साकोली ते गोबरवाहीपर्यंत अवैध धंद्यांचे धाबे दणाणले!

सव्व लाखांच्या मुद्देमालासह सडवा मोहाफास जप्त; गुन्हेगारांवर खाकीचा कडक प्रहार!

​भंडारा (वृत्तसेवा):

जिल्ह्यात अवैध व्यवसायांचे कंबरडे मोडण्यासाठी पोलीस अधीक्षक श्री. नूरुल हसन यांनी सुरू केलेली मोहीम आता अधिक तीव्र झाली आहे. साकोली, अड्याळ, कारधा, जवाहरनगर, आंधळगाव, सिहोरा आणि गोबरवाही अशा एकूण सात ठिकाणी पोलिसांनी धडक कारवाई करत १ लाख ५२ हजार ०९० रुपयांचा अवैध माल जप्त केला आहे.

​📍 सिहोरा अन् आंधळगावमध्ये मोठा साठा हस्तगत:

या कारवाईतील सर्वात मोठी झडप सिहोरा पोलिसांची ठरली. चंद्रप्रकाश गौपाले या २२ वर्षीय तरुणाकडून तब्बल ३६० किलो सडवा मोहाफास (७२ हजार रुपये) जप्त करण्यात आला. तर आंधळगावमध्ये अंकित दहेकर याला १० हजारांची दारू आणि दुचाकीसह अटक करण्यात आली.

​📍 जुगार आणि सट्टा अड्ड्यांवर पोलिसांचा ‘धाक’:

साकोलीत वरली मटका घेणाऱ्या नितेश आदमने आणि इंद्रपाल नंदागवळी यांना पोलिसांनी रंगेहात पकडले. तसेच अड्याळमधील शिवाजी चौकात मधुकर धकाते याच्या सट्टा अड्ड्यावर धाड टाकून रोख रक्कम जप्त केली.

​📍 दारू तस्करांना दणका:

कारधामध्ये प्रल्हाद भुरे, जवाहरनगरमध्ये विजय वाघमारे, गोबरवाहीत चंद्रशेखर अटलखाम आणि पालांदूरमध्ये सुमीत मेश्राम यांच्यावर कारवाई करून पोलिसांनी मोठ्या प्रमाणात हातभट्टीची दारू आणि वाहने जप्त केली आहेत.

​खाकीचा सज्जड इशारा!

​श्री. नूरुल हसन आणि अपर पोलीस अधीक्षक श्री. निलेश मोरे यांच्या मार्गदर्शनाखाली झालेली ही कारवाई म्हणजे जिल्ह्यात अवैध धंदे करणाऱ्यांसाठी शेवटचा इशारा मानला जात आहे.

​वृत्तसंकलन:

अमर वासनिक

न्यूज एडिटर, पोलीस योद्धा न्यूज नेटवर्क