काँग्रेसने धडाडीचा व निष्ठावान नेता गमावला ऊर्जामंत्री डॉ. नितीन राऊत यांची शोकसंवेदना

नागपूर, दि. 26 : रायगड जिल्ह्यातील काँग्रेसचे नेतृत्व करणारे  माणिकराव जगताप यांच्या निधनाने काँग्रेसने एक धडाडीचा व निष्ठावान नेता गमावला आहे, अशा शब्दात ऊर्जामंत्री डॉ. नितीन राऊत यांनी शोक संवेदना व्यक्त केल्या.

विद्यार्थीदशेपासून काँग्रेसचे बाळकडू मिळालेल्या माणिकराव यांनी एन.एस.यू.आय., युवक काँग्रेसमध्ये नेतृत्वाची चमक दाखवित काँग्रेसमध्ये एक स्थान निर्माण केले. रायगड जिल्ह्यात इतर पक्षाचा प्रभाव असताना अत्यंत प्रतिकूल परिस्थितीचा सामना करीत त्यांनी महाड-पोलादपूर या विधानसभा मतदारसंघातून २००४ मध्ये विजय संपादन केला होता. सातत्याने लोकांशी संपर्कात असणारे असे त्यांचे नेतृत्व होते. त्यांनी सातत्याने काँग्रेसचा झेंडा खांद्यावर घेऊन समाजकारण आणि राजकारण केले. विधानसभेत त्यांच्या समवेत काम करण्याची संधी मला मिळाली. विधानसभेतही ते सातत्याने जनतेचे प्रश्न मांडत होते. आपल्या भागाच्या विकासाचे अनेक प्रश्न सोडविण्याची त्यांची हातोटी अनुकरणीय होती. एक उमदा नेता व कुशल संघटक काँग्रेसने गमावला आहे, असेही डॉ. राऊत यांनी शोकसंदेशात म्हटले आहे.