आई-वडील पाल्यांचे पहिले गुरू–प्राचार्य जे.डी.पठान सरस्वती विद्यालयात शिक्षक-पालक सभेचे आयोजन

अर्जुनी मोर:- स्थानिक सरस्वती विद्यालयात वर्ग 5 ते 10 च्या पालक- शिक्षक संघ सभेचे आयोजन प्राचार्य जे.डी.पठान यांच्या अध्यक्षतेखाली करण्यात आले. सत्र 2025-26मधील या पहिल्या पालक शिक्षक सभेत विविध विषयांवर सविस्तर चर्चा करून ठराव घेण्यात आले.सर्वप्रथम सत्र 2024-25 मधील एस.एस.सी. व एच.एस.सी. परीक्षेच्या निकालाबाबत माहिती सांगून गुणवंत विद्यार्थ्यांचे कौतुक करण्यात आले. यानंतर सत्र 2025-26 करिता पालक-शिक्षक संघाची कार्यकारिणी स्थापन करण्यात आली. कार्यकारणीत विद्यालयाचे प्राचार्य हे पदसिद्ध अध्यक्ष असतात. उपाध्यक्ष म्हणून वर्ग 8 ते 10 साठी गजानन नाकाडे यांची निवड करण्यात आली.सचिव म्हणून कुंडलिक लोथे तर सहसचिव म्हणून वर्ग 5 ते 7 साठी स्मिता मेश्राम यांची निवड करण्यात आली.तसेच प्रत्येक वर्गातून एक पालक सदस्य व वर्गाचे वर्गशिक्षक यांची कार्यकारणी सदस्य म्हणून निवड करण्यात आली.
यानंतर सत्र 2025-26 साठी तयार करण्यात आलेल्या शालेय व सहशालेय उपक्रमाच्या नियोजनास मंजुरी तसेच परीक्षांचे नियोजन सोबतच ईबीसी, पिटीसी, स्कॉलरशिप फार्म सादर करण्याविषयीची माहिती तसेच बाहेरगावाहून प्रवास करणाऱ्या विद्यार्थ्यांच्या सुरक्षिततेच्या दृष्टीने शालेय बस बाबत माहिती सभेमध्ये उपप्राचार्य महेश पालीवाल यांनी दिली. तसेच एलिमेंट्री व इंटरमिजिएट या ड्रॉइंगच्या परीक्षेबाबत सविस्तर माहिती सभेमध्ये देण्यात आली.सभेचे अध्यक्ष प्राचार्य जे.डी.पठान यांनी आपल्या अध्यक्षीय मार्गदर्शनातून पालकांना संबोधित करताना सांगितले की,मुलांच्या बालमनावर घरातूनच संस्कार होत असतात, त्यामुळे पालकांनी पाल्यांशी संवाद वाढवावा तसेच विद्यार्थ्यांना मोबाईल पासून जास्तीत जास्त दूर ठेवावे.आई-वडील पाल्यांचे पहिले गुरू असतात असे प्रतिपादन त्यांनी केले तसेच पालकांना त्यांच्या पाल्यांबाबत असलेल्या समस्यांचे त्यांनी निराकरण केले.संचालन करून आभार कुंडलिक लोथे यांनी मानले. सभेसाठी सर्व शिक्षक वृंदांनी सहकार्य केले.