नाशिक जिल्हा चाईल्ड फ्रेंडली होण्यासाठी प्रयत्न करणार : डॉ. आर. जी. आनंद. कोविड काळात जिल्हा प्रशासन, आरोग्य व पोलिस यंत्रणांनी केलेले कार्य कौतुकास्पद

नाशिक दिनांक 3 (जिमाका वृत्तसेवा) : मुलांची सामाजिक सुरक्षा व हक्कांबाबत जिल्ह्यात चांगले काम करण्यात येत आहे. तसेच कोविड कालावधीत देखील 18 वर्षांखालील मुलांची मानसिकता स्थिर राहण्यासाठी सर्वच संबंधित यंत्रणांमार्फत चांगले प्रयत्न करण्यात आले आहेत. याच अनुषंगाने 18 वर्षांखालील मुलांना त्यांच्या भविष्यासाठी पोषक असे सामाजिक वातावरण मिळावे यादृष्टीने नाशिक जिल्हा ‘चाईल्ड फ्रेंडली’ होण्यासाठी प्रयत्न करण्यात येणार आहेत, असे प्रतिपादन राष्ट्रीय बाल हक्क संरक्षण आयोगाचे सदस्य डॉ. आर. जी. आनंद  यांनी  केले आहे.

जिल्हाधिकारी कार्यालयातील मध्यवर्ती सभागृहात आयोजित राष्ट्रीय बाल हक्क संरक्षण आयोगाच्या आढावा बैठकीत डॉ. आनंद बोलत होते. यावेळी जिल्हाधिकारी सूरज मांढरे, जिल्हा पोलिस अधिक्षक सचिन पाटील, विधी सेवा प्राधिकरणाचे सचिव प्रसाद कुलकर्णी, जिल्हा शल्यचिकित्सक डॉ. रत्ना रावखंडे, जिल्हा महिला व बाल विकास अधिकारी  एस. डी. पाटील, सहाय्यक कामगार आयुक्त सुजित शिर्के, जिल्हा आरोग्य अधिकारी डॉ. कपिल आहेर, नाशिक बाल विकास प्रकल्प अधिकारी अजय फडोळ, उपमुख्य कार्यकारी अधिकारी दिपक चाटे, जिल्हा समाज कल्याण अधिकारी रवींद्र परदेशी, मालेगाव शहराचे बाल विकास प्रकल्प अधिकारी सुनिल दुसाने, बाल कल्याण समितीच्या अध्यक्षा एस. डी. बेलगांवकर आदी उपस्थित होते.

 यावेळी डॉ. आनंद म्हणाले, कोविड काळात 18 वर्षांखालील मुलांचे मानसिक व शारीरिक स्वास्थ्य टिकवण्यासाठी जिल्हा प्रशासन व संबंधित यंत्रणांमार्फत चांगले उपक्रम राबविले गेले आहेत. याच परिस्थितीच्या अनुषंगाने नाशिक जिल्हा ‘चाईल्ड फ्रेंडली’ करण्याच्या दृष्टीने 18 वर्षांखालील मुलांच्या सर्वांगीण विकासासाठी प्रयत्न करण्यात येणार आहे. याअंतर्गत 18 वर्षांखालील मुलांना त्यांचा शिक्षणाचा हक्क मिळावा, बालकांच्या होणाऱ्या मानसिक व शारीरिक शोषणाला प्रतिबंध बसावा, बाल मजुरीतून त्यांची सुटका व्हावी, जिल्ह्यातील बाल मृत्यूचे प्रमाण कमी व्हावे यासाठी विविध उपाययोजना राबविण्यात येणार आहेत, असे डॉ. आनंद यांनी यावेळी सांगितले.

तसेच चाईल्ड लाईन संस्थेकडे 18 वर्षांच्या आतील मुलांच्या अनुषंगाने बालविवाह, बाल मजुरी, शोषण, मारहाण अशा विविध स्वरूपाच्या प्राप्त होणाऱ्या तक्रारींबाबत चाईल्ड लाईन संस्था बाल कल्याण समिती व संबंधित यंत्रणेच्या मदतीने प्राप्त तक्रारींवर योग्यती कार्यवाही करण्यात येईल. आणि त्याबाबत केलेल्या कार्यवाहीचा नियमित अहवाल जिल्हा बाल विकास अधिकारी यांचेमार्फत जिल्हाधिकारी यांना सादर करण्याच्या सुचनाही डॉ. आनंद यांनी यावेळी दिल्या आहेत.

कोविड काळात 18 वर्षांच्या आतील मुलांचे मानसिक स्वास्थ चांगले राहावे यासाठी राष्ट्रीय बाल हक्क संरक्षण आयोगामार्फत ‘संवेदना’ या उपक्रमाच्या अंतर्गत 18001212830 हा टोल फ्री क्रमांक उपलब्ध करून देण्यात आला आहे. या क्रमांकावर प्रादेशिक भाषांमध्ये मुलांचे समुपदेशन करण्यात येत असल्याचेही डॉ. आनंद यांनी यावेळी सांगितले.

 जिल्हाधिकारी सूरज मांढरे म्हणाले, ग्रामीण भागात मुलांच्या निरोगी आरोग्यासाठी चाईल्ड केअर सेंटर तयार करण्यात आले आहे. तसेच बालकांमधील कुपोषण व बालमृत्यूचे प्रमाण कमी करण्यासाठी जिल्हा परिषदेच्या मार्फत एक मूठ पोषण आहार अभियान यासारखे उपक्रम राबविण्यात येत असून बालकांच्या सुदृढ व निरोगी भविष्यासाठी लहानपणापासूनच त्यांच्या पोषण आहारावर लक्ष केंद्रित करण्यात येते. त्यामुळे देशातील बालमृत्यूचे एक हजारामागे 39, राज्याचे 19 तर नाशिक जिल्ह्याचे प्रमाण 10 इतके असल्याची माहितीही जिल्हाधिकारी                    श्री. मांढरे यांनी यावेळी दिली.

 पोलिस अधीक्षक श्री. पाटील म्हणाले, 18 वर्षांखालील मुलांचे घर, शाळा तसेच इतर सार्वजनिक ठिकाणी होणारे  मानसिक व शारिरीक शोषण रोखण्यासाठी ‘पोलिस दिदी व पोलिस काका’ हा उपक्रम राविण्यात येतो. याअंतर्गत मुलांना चांगल्या व वाईट स्पर्शाबाबत माहिती देण्यात येते. त्यांना सामाजात सुरक्षित वातावरण मिळावे यासाठी त्यांच्यासोबत सातत्याने संवाद साधण्याचे काम संबंधित पोलिस यंत्रणेमार्फत करण्यात येत असल्याचे पोलिस अधीक्षक श्री. पाटील यांनी यावेळी सांगितले.

 या बैठकीत बाल हक्कांच्या संरक्षणाबाबत काम करणाऱ्या उपस्थित विभागांनी केलेल्या कामांचा अहवाल यावेळी सादर केला.